വിമർശിക്കുന്നവർ സ്വയം തിരിഞ്ഞുനോക്കണം; മുരളീധരനെതിരെ മുല്ലപ്പള്ളിയുടെ ഒളിയമ്പ്

തിരുവനന്തപുരം: കെപിസിസി ഭാരവാഹി പട്ടികക്കെതിരെയുള്ള കെ മുരളീധരൻ എംപി ഉന്നയിച്ച വിമർശനത്തിന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്റെ പരോക്ഷമായ മറുപടി. ഭാരവാഹി പട്ടികയെ വിമർശിക്കുന്നവർ സ്വയം തിരിഞ്ഞു നോക്കണമെന്ന്​ മുല്ലപ്പള്ളി പറഞ്ഞു. പുനഃസംഘടിപ്പിച്ച കെപിസിസിയുടെ ആദ്യ യോഗത്തിലായിരുന്നു മുല്ലപ്പള്ളിയുടെ ഒളിയമ്പ്. 

പാർട്ടിയിൽ പരസ്യ വിമർശനങ്ങൾ അനുവദിക്കില്ലെന്ന് മുല്ലപ്പള്ളി പറഞ്ഞു. അച്ചടക്ക ലംഘനം കോൺഗ്രസിൽ വെച്ചുപൊറുപ്പിക്കില്ല. സമൂഹ മാധ്യമങ്ങളിൽ നേതാക്കളെ അപകീർത്തിപ്പെടുത്തിയാൽ കടുത്ത നടപടി നേരിടേണ്ടി വരുമെന്നും മുല്ലപ്പള്ളി മുന്നറിയിപ്പ്​ നൽകി. 

യോ​ഗ്യതയുള്ളവരാണ് കെപിസിസി ഭാരവാഹികളായി എത്തിയിട്ടുള്ളത്. മുമ്പ്​ പല പദവികളും ഏറ്റെടുത്ത സമയത്ത്​ പാർട്ടിക്ക്​ വേണ്ടി കഠിനാധ്വാനം ചെയ്​തവരാണ്​ അവർ. ലോക്​സഭ തെരഞ്ഞെടുപ്പിൽ 19 സീറ്റിലും വിജയിച്ച സാഹചര്യം മാറിയിട്ടുണ്ട്​. എല്ലാ നേതാക്കളും ഭാരവാഹികളും കഠിനാധ്വാനം ചെയ്​താൽ മാത്രമേ യുഡിഎഫിന്​ തദ്ദേശ തെരഞ്ഞെടുപ്പിലും നിയമസഭ തെരഞ്ഞെടുപ്പിലും വിജയിക്കാൻ സാധിക്കൂ എന്നും മുല്ലപ്പള്ളി പറഞ്ഞു.