കൂട്ടുകാരുമൊത്തുള്ള മദ്യപാനം ചോദ്യം ചെയ്തതിന് മുത്തച്​ഛൻ കൊച്ചുമകളെ വെട്ടിപ്പരിക്കേൽപ്പിച്ചു

കോട്ടയം: കൂട്ടുകാരുമൊത്ത് വീട്ടിൽ മദ്യപിച്ചത് ചോദ്യംചെയ്തതിന് കൊച്ചുമകളെ മുത്തച്​ഛൻ വെട്ടിപ്പരിക്കേൽപ്പിച്ചു. തിരുവല്ലയിലെ നെടുമ്പ്രത്താണ് സംഭവം. 76കാരനായ കമലാസനൻ ആണ് പ്ലസ് ടു വിദ്യാർത്ഥിനിയായ കൊച്ചുമകളെ ആക്രമിച്ചത്. കഴിഞ്ഞ വ്യാഴാഴ്ച്ച​ വൈകീട്ടാണ്​ സംഭവം.              

പിതാവ് മരിച്ചുപോയ പെൺകുട്ടിയും മാതാവും മുത്തച്​ഛനും അമ്മൂമ്മയുമാണ് വീട്ടിൽ താമസം. കമലാസനൻ വീട്ടിൽ കൂട്ടുകാരുമൊത്ത് മദ്യപിക്കുന്നത് പെൺകുട്ടിയും മാതാവ് അമ്പിളി പലതവണ എതിർത്തിരുന്നു. സംഭവദിവസം അമ്പിളി പുറത്തുപോയ സമയത്താണ് കമലാസനൻ കൂട്ടുകാരുമൊത്ത് മദ്യപിച്ചത്. മടങ്ങിയെത്തിയ അമ്പിളി വീട്ടിൽ നടന്ന മദ്യപാനത്തെക്കുറിച്ച് കമലാസനനോട് ചോദിച്ചു. ഇതിൽ ക്ഷുഭിതനായി അടുക്കളയിൽനിന്ന്​ വെട്ടുകത്തി എടുത്ത് അമ്പിളിയെ ആക്രമിക്കുകയായിരുന്നു. ഇതിനിടെയാണ് മകൾക്ക് വെട്ടേറ്റത്.

പെൺകുട്ടിയുടെ ഇരു കൈകൾക്കും സാരമായി പരിക്കേറ്റു. തിരുവല്ല താലൂക്ക് ആശുപത്രിയിൽ പ്രവേശിപ്പിച്ച പെൺകുട്ടിയുടെ രണ്ട് കൈകളിലുമായി എട്ട് തുന്നലുകളിട്ടു. ആശുപത്രിയിൽനിന്ന്​ ലഭിച്ച വിവരത്തിന്റെ അടിസ്ഥാനത്തിൽ കമലാസനനെ പ്രതിയാക്കി പൊലീസ് കേസ് രജിസ്​റ്റർ ചെയ്തിട്ടുണ്ട്. സംഭവത്തെ തുടർന്ന് കമലാസനൻ ഒളിവിൽ പോയിരുന്നു.