മലപ്പുറം: മലപ്പുറം ജില്ലയില് 58 പേര്ക്ക് കൂടി ഇന്ന് കോവിഡ് 19 സ്ഥിരീകരിച്ചു. ഇവരില് 22 പേര്ക്ക് സമ്പര്ക്കത്തിലൂടെയാണ് രോഗബാധയുണ്ടായത്. പൊന്നാനിയില് രോഗ വ്യാപനം തടയുന്നതിന്റെ ഭാഗമായി നടത്തിയ പരിശോധനയിലാണ് ഇതില് 21 പേര്ക്കും വൈറസ് ബാധ സ്ഥിരീകരിച്ചത്. രോഗം സ്ഥിരീകരിച്ചവരില് ശേഷിക്കുന്ന ഏഴുപേര് ഇതര സംസ്ഥാനങ്ങളില് നിന്നും 29 പേര് വിദേശ രാജ്യങ്ങളില് നിന്നും എത്തിയവരാണ്.
രോഗം സ്ഥിരീകരിച്ചവരുമായി ഏതെങ്കിലും വിധത്തില് സമ്പര്ക്കം പുലര്ത്തിയവര് വീടുകളില് പ്രത്യേക മുറികളില് നിരീക്ഷണത്തില് കഴിയണം. ഈ വിവരം ആരോഗ്യ പ്രവര്ത്തകരെ അറിയിക്കണം. വീടുകളില് നിരീക്ഷണത്തിന് സൗകര്യമില്ലാത്തവര്ക്ക് സര്ക്കാര് ഒരുക്കിയ കോവിഡ് കെയര് സെന്ററുകള് ഉപയോഗപ്പെടുത്താം. ആരോഗ്യ പ്രശ്നങ്ങളുണ്ടായാല് ഒരു കാരണവശാലും നേരിട്ട് ആശുപത്രികളില് പോകരുത്. ജില്ലാതല കണ്ട്രോള് സെല്ലില് വിളിച്ച് ലഭിക്കുന്ന നിര്ദേശങ്ങള് പൂര്ണമായും പാലിക്കണം. ജില്ലാതല കണ്ട്രോള് സെല് നമ്പറുകള്: 0483 2737858, 2737857, 2733251, 2733252, 2733253.
കോവിഡ് 19 സ്ഥിരീകരിച്ച് മലപ്പുറം ജില്ലയില് ചികിത്സയിലായിരുന്ന 9 പേര് കൂടി ഇന്ന് രോഗമുക്തരായി. രോഗബാധിതരായി 591 പേര് ചികിത്സയില് കഴിയുന്നു. ജില്ലയില് ഇതുവരെ 1,111 പേര്ക്കാണ് വൈറസ് ബാധ സ്ഥിരീകരിച്ചത്. രോഗ വ്യാപനം തടയുന്നതിന്റെ ഭാഗമായി ഇന്നലെ 1,140 പേര്ക്ക് കൂടി പ്രത്യേക നിരീക്ഷണം ഏര്പ്പെടുത്തി. 42,236 പേരാണ് ഇപ്പോള് ജില്ലയില് നിരീക്ഷണത്തിലുള്ളത്. 727 പേര് വിവിധ ആശുപത്രികളില് നിരീക്ഷണത്തിലുണ്ട്. 39,605 പേര് വീടുകളിലും 1,904 പേര് കോവിഡ് കെയര് സെന്ററുകളിലുമായി പ്രത്യേക നിരീക്ഷണത്തിലുണ്ട്.
ജില്ലയില് നിന്ന് ഇതുവരെ 14,216 പേരുടെ സാമ്പിളുകള് പരിശോധനക്കയച്ചതില് 12,205 പേരുടെ ഫലം ലഭിച്ചു. 11,337 പേര്ക്ക് സ്രവ പരിശോധനയിലൂടെ ഇതുവരെ വൈറസ് ബാധയില്ലെന്ന് സ്ഥിരീകരിച്ചിട്ടുണ്ട്. 2,011 പേരുടെ പരിശോധനാ ഫലങ്ങളാണ് ഇനി ലഭിക്കാനുള്ളത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ