തിരുവനന്തപുരം: ഈ മാസവും മുന്ഗണനേതരക്കാരിലെ പൊതുവിഭാഗം സബ്സിഡി (നീല കാര്ഡ്), പൊതുവിഭാഗം (വെള്ള കാര്ഡ്) റേഷന് കാര്ഡ് ഉടമകള്ക്ക് അധിക വിഹിതമായി 10 കിലോ അരി കിലോയ്ക്കു 15 രൂപ നിരക്കില് ലഭിക്കും. ഇത് 8 മുതല് വിതരണം ചെയ്യുമെന്നു സിവില് സപ്ലൈസ് ഡയറക്ടര് അറിയിച്ചു.
ജൂൺ മാസത്തിൽ വിവിധ വിഭാഗങ്ങൾക്കുള്ള റേഷൻ വിഹിതത്തിൻറെ അളവ് ഭക്ഷ്യസിവിൽ സപ്ലൈസ് വകുപ്പ് പ്രസിദ്ധീകരിച്ചു. അന്ത്യോദയ അന്ന യോജന (എഎവൈ -മഞ്ഞ കാർഡ്) വിഭാഗത്തിന് 30 കിലോ അരിയും അഞ്ച് കിലോ ഗോതമ്പും സൗജന്യമായും ഒരു കിലോ പഞ്ചസാര 21 രൂപയ്ക്കും ലഭിക്കും.
മുൻഗണനാ വിഭാഗക്കാർക്ക് (പിങ്ക് കാർഡ്) കാർഡിലെ ഓരോ അംഗത്തിനും നാല് കിലോ അരിയും ഒരു കിലോ ഗോതമ്പും കിലോയ്ക്ക് രണ്ട് രൂപ നിരക്കിൽ ലഭിക്കും. ഇരു വിഭാഗങ്ങൾക്കും പിഎംജികഐവൈ പദ്ധതി പ്രകാരം കാർഡിന് ഒരു കിലോ പയർ അല്ലെങ്കിൽ കടല സൗജന്യമായി ലഭിക്കും. ഏപ്രിൽ, മേയ് മാസങ്ങളിൽ ലഭിക്കാത്തവർക്ക് അതുകൂടി ചേർത്ത് മൂന്ന് കിലോ ലഭിക്കും. 21 മുതൽ പിഎംജികഐവൈ പദ്ധതി പ്രകാരം കാർഡിലെ ഓരോ അംഗത്തിനും അഞ്ചു കിലോ അരി വീതം സൗജന്യമായും ലഭിക്കും.
പൊതുവിഭാഗം സബ്സിഡി (നീല കാർഡ്) വിഭാഗത്തിൽപ്പെട്ട കാർഡിലെ ഓരോ അംഗത്തിനും രണ്ട് കിലോ അരി വീതം കിലോയ്ക്ക് നാല് രൂപ നിരക്കിൽ ലഭിക്കും. പൊതു വിഭാഗത്തിൽ വെള്ള കാർഡ് വിഭാഗത്തിൽപ്പെട്ടവർക്ക് കാർഡിന് രണ്ട് കിലോ അരി കിലോയ്ക്ക് 10.90 രൂപ നിരക്കിൽ ലഭിക്കും. ഇരു വിഭാഗത്തിനും കിലോയ്ക്ക് 17 രൂപ നിരക്കിൽ ലഭ്യതയ്ക്കനുസരിച്ച് ഒരു കിലോ മുതൽ മൂന്ന് കിലോ വരെ ആട്ട ലഭിക്കും. അധിക വിഹിതമായി 10 കിലോ അരി കിലോയ്ക്ക് 15 രൂപ നിരക്കിൽ എട്ട് മുതലും വിതരണം ചെയ്യും.
എല്ലാവിഭാഗത്തിലെയും വൈദ്യുതീകരിക്കപ്പെടാത്ത വീടുകളിലെ കാർഡിന് നാല് ലിറ്റർ മണ്ണെണ്ണയും വൈദ്യുതീകരിക്കപ്പെട്ട വീടുകളിലെ കാർഡിന് അരലിറ്റർ മണ്ണെണ്ണയും ലിറ്ററിന് 20 രൂപ നിരക്കിൽ വിതരണം ചെയ്യുമെന്നും സിവിൽ സപ്ലൈസ് ഡയറക്ടർ അറിയിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ