തിരുവനന്തപുരം: സംസ്ഥാനത്ത് കോവിഡ് കേസുകളുടെ എണ്ണം വര്ധിക്കുന്നത് ആശങ്കയുണ്ടാക്കിയിട്ടുണ്ടെന്ന് മുഖ്യമന്ത്രി പിണറായി വിജയന്. സമ്പര്ക്കംവഴി രോഗം പടരാനുള്ള സാധ്യത നമുക്കു മുന്നിലുണ്ട്. അതുകൊണ്ടുതന്നെ നമ്മുടെ കരുതല് വര്ധിപ്പിച്ചേ മതിയാകൂ. ക്വാറന്റൈനില് കഴിയുന്നവര് പുറത്തിറങ്ങാനേ പാടില്ല. നിര്ദേശങ്ങള് ലംഘിക്കുന്നവരെ കണ്ടെത്താനായി എല്ലാ ജില്ലകളിലും മോട്ടോര്സൈക്കിള് ബ്രിഗേഡ് സംവിധാനം ഏര്പ്പെടുത്തുമെന്നും മുഖ്യമന്ത്രി പറഞ്ഞു.
ഇന്ന് ഏറ്റവും കൂടുതല് പേരെ ആശുപത്രിയില് പ്രവേശിപ്പിച്ചത് മലപ്പുറം ജില്ലയിലാണ് 36 പേരെ. കോഴിക്കോട് 17, കാസര്കോട് 16 എന്നിങ്ങനെയാണ് ഇന്ന് കൂടുതല് പേരെ ആശുപത്രിയില് പ്രവേശിപ്പിച്ച മറ്റു ജില്ലകള്. വൈറസ് ബാധിച്ച് ഏറ്റവും കൂടുതല് പേര് ആശുപത്രിയില് കഴിയുന്നത് വയനാട് ജില്ലയിലാണ്. 19 പേരാണ് ഇവിടെയുള്ളത്. ഇതുവരെ 42021 സാമ്പിളുകള് പരിശോധനയ്ക്ക് അയച്ചതില് 40639 എണ്ണം രോഗബാധയില്ല എന്നുറപ്പാക്കിയിട്ടുണ്ട്. മുന്ഗണനാവിഭാഗത്തില്പ്പെട്ട 4630 സാമ്പിളുകളില് 4424 സാമ്പിളുകള് നെഗറ്റീവ് ആയിട്ടുണ്ട്. സംസ്ഥാനത്ത് നിലവില് ഹോട്ട്സ്പോട്ടുകളുടെ എണ്ണം 16 ആണ്.ഇതുവരെ കോവിഡ് പോസിറ്റീവ് ആയ 526 കേസുകളില് 311 പേര് വിദേശത്തുനിന്ന് വന്നവരാണ്. എട്ട് പേര് വിദേശികളാണ്. മറ്റു സംസ്ഥാനങ്ങളില് നിന്ന് വന്നവരാണ് 70 പേര്. സമ്പര്ക്കത്തിലൂടെ രോഗബാധിതരായത് 187 പേരാണ്.
ഇന്ന് 16 പേര്ക്ക് കോവിഡ് 19 സ്ഥിരീകരിച്ചു. നെഗറ്റീവ് കേസുകളില്ല. വയനാട് 5, മലപ്പുറം 4, ആലപ്പുഴ, കോഴിക്കോട് രണ്ടുവീതം, കൊല്ലം, പാലക്കാട്, കാസര്കോട് ഒന്നുവീതം എന്നിങ്ങനെയാണ് പോസിറ്റീവ് ആയത്. സംസ്ഥാനത്തെ ഹോട്ട് സ്പോട്ടുകളുടെ എണ്ണം 16 ആയതായും മുഖ്യമന്ത്രി പറഞ്ഞു.
പോസിറ്റീവ് ആയവരില് ഏഴു പേര് വിദേശത്തുനിന്നു വന്നവരാണ്. തമിഴ്നാട്ടില്നിന്നു വന്ന നാലു പേര്ക്കും മുംബൈയില്നിന്നു വന്ന രണ്ടു പേര്ക്കും രോഗബാധ ഉണ്ടായി. മൂന്നു പേര്ക്ക് രോഗബാധ ഉണ്ടായത് സമ്പര്ക്കത്തിലൂടെയാണ്. സംസ്ഥാനത്ത് ഇതുവരെ 576 പേര്ക്കാണ് രോഗം സ്ഥിരീകരിച്ചത്. 80 പേര് ചികിത്സയിലുണ്ട്. 48825 പേരാണ് നിരീക്ഷണത്തിലുള്ളത്. 48287 പേര് വീടുകളിലും 538 പേര് ആശുപത്രികളിലുമാണ് നിരീക്ഷണത്തില് കഴിയുന്നത്. 122 പേരെയാണ് ഇന്ന് ആശുപത്രിയില് പ്രവേശിപ്പിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ