തൃശൂർ: 28 കിലോ കഞ്ചാവ് വീട്ടുമുറ്റത്ത് കുഴിച്ചിട്ട നിലയിൽ കണ്ടെത്തി. മാള പുത്തൻചിറ സ്വദേശി ഷിജോയുടെ വീട്ടു പറമ്പിലാണ് കഞ്ചാവ് കണ്ടെത്തിയത്. നിലവിൽ ഇയാൾ മറ്റൊരു കഞ്ചാവ് കേസിൽ അറസ്റ്റിലാണ്.
രഹസ്യ വിവരം ലഭിച്ചതിനെ തുടർന്ന് പൊലീസ് വീട്ടിൽ നടത്തിയ പരിശോധനയിലാണ് കഞ്ചാവ് പിടികൂടിയത്. വീടിനു പിറകിൽ തൊഴുത്തിന് സമീപം കുഴിച്ചിട്ട നിലയിലാണ് കഞ്ചാവ് കണ്ടെത്തിയത്. 13 പാക്കറ്റുകളിലായി 28 കിലോ കഞ്ചാവാണ് പിടികൂടിയത്. കഞ്ചാവിന് 30 ലക്ഷത്തിലധികം വില വരുമെന്ന് പൊലീസ് അറിയിച്ചു.
ചെറിയ പാക്കറ്റുകളിലാക്കി വിതരണം നടത്താൻ ആയിരുന്നു പദ്ധതി. വീര്യം കൂടിയ കഞ്ചാവ് ആണ് ഇതെന്നും അതുകൊണ്ടു തന്നെ വില കൂടുമെന്നും ഉദ്യോഗസ്ഥർ വ്യക്തമാക്കി.
തൃശൂർ പൊലീസിലെ ആൻ്റി നാർക്കോട്ടിക് സ്ക്വാഡും ഷാഡോ പൊലീസും ചേർന്നാണ് കഞ്ചാവ് പിടികൂടിയത്. ഷിജോ നിരവധി ക്രിമിനൽ കേസുകളിൽ പ്രതിയാണെന്നും ഇയാൾ നിലവിൽ മറ്റൊരു കഞ്ചാവ് കേസിൽ അറസ്റ്റിലാണെന്നും പൊലീസ് വ്യക്തമാക്കി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ