ബെംഗളൂരു: ചെയ്യാത്ത കാര്യങ്ങള് സമ്മതിപ്പിക്കാന് ഇ ഡി ശ്രമിക്കുന്നതായി ബിനീഷ് കോടിയേരി. ദേഹാസ്വസ്ഥ്യത്തെ തുടര്ന്ന് സ്കാന് ചെയ്ത് മടങ്ങുമ്പോഴാണ് മാധ്യമങ്ങളുടെ ചോദ്യത്തിനോട് ബിനീഷ് പ്രതികരിച്ചത്. ചോദ്യംചെയ്യലിനിടെ ദേഹാസ്വാസ്ഥ്യം ഉണ്ടായതിനെ തുടര്ന്ന് ഇന്ന് വൈകിട്ടോടെയാണ് ബിനീഷിനെ വിക്ടോറിയ ആശുപത്രിയില് പ്രവേശിപ്പിച്ചത്.
ബിനീഷിനെ കാണാനായി ആശുപത്രിയില് സഹോദരന് ബിനോയും അഭിഭാഷകരും എത്തിയെങ്കിലും ഉദ്യോഗസ്ഥര് സമ്മതിച്ചില്ല. തുടര്ന്ന് ഇരുകൂട്ടരും തമ്മില് ആശുപത്രിയില് വെച്ച് വാക്കുതര്ക്കമുണ്ടായി. ബിനീഷിനെ ദേഹോപദ്രവം ഏല്പ്പിച്ചോയെന്ന് സംശയിക്കുന്നതായി അഭിഭാഷകര് പറഞ്ഞു.
ലഹരിമരുന്ന് കടത്തുമായി ബന്ധപ്പെട്ട പണമിടപാട് കേസില് വ്യാഴാഴ്ചയാണ് ബിനീഷ് കോടിയേരിയെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തത്. കഴിഞ്ഞ നാലുദിവസമായി ഇദ്ദേഹത്തെ ചോദ്യം ചെയ്തുവരികയാണ്. കേസുമായി ബന്ധപ്പെട്ട് രണ്ടാം തവണ ചോദ്യം ചെയ്യാനായി ബിനീഷ് കോടിയേരിയെ വിളിച്ചുവരുത്തിയ ശേഷമായിരുന്നു അറസ്റ്റ്.
ലഹരിമരുന്ന് കേസില് പ്രതിയായ അനൂപ് മുഹമ്മദിന് സാമ്പത്തിക സഹായം നല്കി കളളപ്പണം വെളുപ്പിക്കാന് ശ്രമിച്ചു എന്നതാണ് കേസ്. മയക്കു മരുന്നു കച്ചവടക്കാരന് അനൂപ് മുഹമ്മദ് ബിനീഷ് കോടിയേരിയുടെ ബിനാമിയെന്ന് എന്ഫോഴ്സമെന്റ് ഡയറക്ടറേറ്റ് വ്യക്തമാക്കി. അനൂപിന്റെ അക്കൗണ്ടിലേക്ക് ബിനീഷ് വന് തുകകള് പലപ്പോഴായി ട്രാന്സ്ഫര് ചെയ്തതായി ഇഡി അന്വേഷണത്തില് കണ്ടെത്തി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ