കൊച്ചി: അശ്ലീല പരാമര്ശം നടത്തിയ യൂട്യൂബര് വിജയ് പി നായരെ മര്ദ്ദിച്ച കേസില് ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മി അടക്കം മൂന്ന് പ്രതികളുടെ അറസ്റ്റിന് വിലക്ക്. കേസില് പ്രതികളുടെ മുന്കൂര് ജാമ്യാപേക്ഷയില് വെളളിയാഴ്ച വിധി പറയും വരെ ഭാഗ്യലക്ഷ്മി അടക്കം മൂന്ന് പേരെ അറസ്റ്റ് ചെയ്യരുതെന്ന് ഹൈക്കോടതി നിര്ദേശിച്ചു. മുന്കൂര് ജാമ്യം നല്കുന്നത് തെറ്റായ സന്ദേശം നല്കുമെന്ന് പ്രോസിക്യൂഷന് വാദിച്ചു.
ഭാഗ്യലക്ഷ്മിക്ക് പുറമെ ദിയ സന, ശ്രീലക്ഷ്മി അറയ്ക്കല് എന്നിവരാണ് മുന്കൂര് ജാമ്യം തേടി കോടതിയെ സമീപിച്ചത്. വിജയ് പി നായരുടെ മുറിയില് കടന്നു കയറി ആക്രമിച്ചിട്ടില്ല. പ്രശ്നം പറഞ്ഞ് പരിഹരിക്കാനാണ് പോയതെന്നുമാണ് ഹര്ജിക്കാരുടെ വാദം. എന്നാല് വിജയ് പി നായര് ഇങ്ങോട്ട് പ്രകോപനപരമായി പെരുമാറുകയായിരുന്നു. വിജയ് പി നായരുടെ ലാപ്ടോപ്, മൊബൈല് ഫോണ് എന്നിവ പൊലീസിന് കൈമാറിയിട്ടുണ്ട്. മോഷണം നടത്താനുള്ള ഉദ്ദേശത്തോടെയല്ല ഇത് കൊണ്ടുപോയതെന്നും ഹര്ജിയില് പറയുന്നു.
കേസില് പൊലീസ് അറസ്റ്റ് ചെയ്യുമെന്ന ഭയമുണ്ട്. ഇത് തങ്ങള്ക്ക് സമൂഹത്തിലുള്ള അംഗീകാരത്തെ മോശമായി ബാധിക്കുമെന്നതിനാല് അറസ്റ്റ് തടയണമെന്നുമാണ് ഭാഗ്യലക്ഷ്മി അടക്കമുള്ളവര് ഹര്ജിയില് ആവശ്യപ്പെടുന്നത്. ഭാഗ്യലക്ഷ്മി അടക്കമുള്ളവരുടെ ജാമ്യ ഹര്ജിയെ സെഷന്സ് കോടതിയില് പൊലീസ് ശക്തമായി എതിര്ത്തിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ