തിരുവനന്തപുരം: മുന്നോക്ക വിഭാഗങ്ങളില് സാമ്പത്തികമായി പിന്നോക്കം നില്ക്കുന്നവര്ക്ക് സര്ക്കാര് ജോലികളില് സംവരണം ഏര്പ്പെടുത്തിക്കൊണ്ടുള്ള ഗസറ്റ് വിജ്ഞാപനമിറങ്ങി. മന്ത്രിസഭാ യോഗത്തിലാണ് തീരുമാനം. ജസ്റ്റിസ് ശശിധരന് നായര് അധ്യക്ഷനായ കമ്മിറ്റിയുടെയും പിഎസ്സിയുടെയും ശുപാര്ശകള് പരിഗണിച്ചു കൊണ്ടാണ് കെഎസ്എസ്ആറില് ഭേദഗതി വരുത്താന് മന്ത്രിസഭാ യോഗത്തില് തീരുമാനിച്ചത്.
സാമ്പത്തികമായി പിന്നോക്കം നില്ക്കുന്ന മുന്നോക്കകാര്ക്ക് സര്ക്കാര് ജോലികളില് 10 ശതമാനം സംവരണമേര്പ്പെടുത്തിയാണ് വിജ്ഞാപനം. ഇതോടെ ഇനി മുതലുള്ള എല്ലാ പിഎസ്സി നിയമനങ്ങള്ക്കും സംവരണം ബാധകമാണ്. മുന്നോക്ക വിഭാഗങ്ങളിലെ പിന്നോക്കക്കാര്ക്ക് പത്ത് ശതമാനം സാമ്പത്തിക സംവരണം കേന്ദ്രം തീരുമാനിച്ചെങ്കിലും ചട്ടങ്ങള് ഭേദഗതി ചെയ്യാത്തത് മൂലം സംസ്ഥാനത്ത് നടപ്പായിരുന്നില്ല.
പൊതുവിഭാഗത്തില് നിന്നായിരിക്കും പത്ത് ശതമാനം സംവരണം. അതിനാല് ഇത് മറ്റ് സംവരണ വിഭാഗങ്ങളെ ബാധിക്കില്ല. നാല് ലക്ഷം രൂപ വരെ വാര്ഷിക വരുമാനമുള്ളവര്ക്ക് ആനുകൂല്യം ലഭിക്കും. സാമ്പത്തിക സംവരണം നടപ്പാക്കാത്തതില് എന്എസ്എസ് കടുത്ത അതൃപ്തി പ്രകടിപ്പിച്ചിരുന്നു. എസ്എന്ഡിപി ഡോ. പല്പ്പുവിന്റെ ജന്മദിനമായ നവംബര് രണ്ടിന് പ്രതിഷേധ ദിനമായി ആചരിക്കാനും തീരുമാനിച്ചിട്ടുണ്ട്. ഇതിന് പിന്നാലെയാണ് മന്ത്രിസഭാ യോഗം ഇക്കാര്യത്തില് തീരുമാനമെടുത്തത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ