തിരുവനന്തപുരം: സംസ്ഥാനത്തിന് 4,53,220 ഡോസ് വാക്സിന് കൂടി ലഭ്യമായതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. 2,91,100 ഡോസ് കോവിഷീല്ഡ് വാക്സിനും 1,62,120 ഡോസ് കോവാക്സിനുമാണ് ലഭ്യമായത്. തിരുവനന്തപുരം 98,570, എറണാകുളം 1,14,590, കോഴിക്കോട് 77,940 എന്നിങ്ങനെ ഡോസ് കോവിഷീല്ഡ് വാക്സിനും തിരുവനന്തപുരത്ത് 1,62,120 ഡോസ് കോവാക്സിനുമാണെത്തിയത്. ഇത് എല്ലാ ജില്ലകളിലുമായി വിതരണം ചെയ്തു വരുന്നു.
അതേസമയം, കോവിഡ് വ്യാപനം രൂക്ഷമായി തന്നെ നില്ക്കുന്ന സാഹചര്യത്തില് സംസ്ഥാനത്ത് അടുത്ത ആഴ്ച മുതല് രാത്രികാല കര്ഫ്യൂ ഏര്പ്പെടുത്തുമെന്ന് മുഖ്യമന്ത്രി പിണറായി വിജയന് വ്യക്തമാക്കി, രാത്രി 10 മുതല് രാവിലെ ആറ് വരെ ആയിരിക്കും കര്ഫ്യൂ.
ലോക്ക്ഡൗണ് മാനദണ്ഡങ്ങള് കടുപ്പിക്കുമെന്നും മുഖ്യമന്ത്രി വാര്ത്താ സമ്മേളനത്തില് വ്യക്തമാക്കി. പ്രതിവാര രോഗബാധാ - ജനസംഖ്യാ അനുപാതം (ഡബ്ല്യുപിആര്) ഏഴില് കൂടുതലുള്ള പ്രദേശങ്ങളിലും ലോക്ക്ഡൗണ് ഏര്പ്പെടുത്തും. ഞായറാഴ്ച സംസ്ഥാനത്ത് സമ്പൂര്ണ ലോക്ക്ഡൗണ് ആയിരിക്കുമെന്ന് നേരത്തെ തന്നെ പ്രഖ്യാപിച്ചിരുന്നതാണ്. പുതിയ സാഹചര്യം കണക്കിലെടുത്താണ് ലോക്ക്ഡൗണ് മാനദണ്ഡങ്ങള് കടുപ്പിക്കുകയും രാത്രികാല കര്ഫ്യൂ ഏര്പ്പെടുത്തുകയും ചെയ്യുന്നതെന്ന് മുഖ്യമന്ത്രി പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ