തിരുവനന്തപുരം: കേരള അഡ്മിനിസ്ട്രേറ്റീവ് സര്വീസ് (കെ എ എസ് ജൂനിയര് ടൈം സ്കെയില്) ഉദ്യോഗസ്ഥരുടെ ശമ്പളവും മറ്റ് ആനുകൂല്യങ്ങളും മന്ത്രിസഭാ യോഗം തീരുമാനിച്ചു. അടിസ്ഥാന ശമ്പളം 81,800 രൂപ (ഫിക്സഡ്) ആയിരിക്കും.
അനുവദനീയമായ ഡിഎ, എച്ച്ആര്എ എന്നിവയും 10% ഗ്രേഡ് പേയും അനുവദിക്കും. പരിശീലന കാലയളവില് അടിസ്ഥാന ശമ്പളമായി നിശ്ചയിച്ച 81,800 രൂപ മാത്രമേ ഉണ്ടാകൂ. മുന് സര്വീസില് നിന്നു കെ എ എസില് എത്തുന്നവര്ക്ക് പരിശീലന കാലയളവില് അവര്ക്ക് അവസാനം ലഭിച്ച ശമ്പളമോ 81,800 രൂപയോ (ഏതാണോ കൂടുതല് അത്) നല്കും. പരിശീലനം പൂര്ത്തിയാക്കി ജോലിയില് പ്രവേശിക്കുമ്പോള് മുന് സര്വീസില് നിന്നു വിടുതല് ചെയ്തു വരുന്ന ജീവനക്കാര്ക്ക് ആ തീയതിയില് ലഭിച്ച അടിസ്ഥാന ശമ്പളം ഇപ്പോള് നിശ്ചയിച്ച അടിസ്ഥാന ശമ്പളത്തെക്കാള് കൂടുതല് ആണെങ്കില് കൂടുതലുള്ള ശമ്പളം അനുവദിക്കും.
പുതിയതായി നിയമനം ലഭിച്ച കെ എ എസ് ഉദ്യോഗസ്ഥരുടെ പരിശീലനം തുടങ്ങേണ്ട സാഹചര്യത്തിലാണ് ശമ്പളവും ആനുകൂല്യങ്ങള് സര്ക്കാര് നിശ്ചയിച്ചത്. ഇവര്ക്കു സെക്രട്ടേറിയറ്റിലെ അണ്ടര് സെക്രട്ടറി ഹയര് തസ്തികയുടെ ശമ്പളം അനുവദിക്കാന് ആദ്യം ആലോചിച്ചിരുന്നു. എന്നാല് ഐ എ എസ് ഉദ്യോഗസ്ഥരുടെയും മറ്റും എതിര്പ്പിനെത്തുടര്ന്ന് പുതിയ സ്കെയില് നിശ്ചയിക്കുകയായിരുന്നു. അണ്ടര് സെക്രട്ടറി ഹയറിന്റെ ശമ്പള സ്കെയില് 95,600-1,53,200 ആണ്. അണ്ടര് സെക്രട്ടറിയുടേത് 63,700 1,23,700. ഡപ്യൂട്ടി കലക്ടര്ക്കും ഇതേ ശമ്പള സ്കെയിലാണ്. കെ എ എസ് ഉദ്യോഗസ്ഥര്ക്ക് ഇതിന്റെ രണ്ടിന്റെയും ഇടയിലുള്ള സ്കെയിലാണ് ഇപ്പോള് അനുവദിച്ചത്.
18 മാസമാണ് പരിശീലനം. ഒരു വര്ഷം പ്രീ സര്വീസ് പരിശീലനവും സര്വീസില് പ്രവേശിച്ചു പ്രബേഷന് പൂര്ത്തിയാക്കുന്നതിന് മുന്പ് 6 മാസത്തെ പരിശീലനവും ഉണ്ടാകും. അതിനു ശേഷം ഡിഎ, എച്ച്ആര്എ എന്നിവയ്ക്കും 10% ഗ്രേഡ് പേയ്ക്കും അര്ഹത ലഭിക്കും.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ