കളമശേരിയിൽ എൽഡിഎഫിന് അട്ടിമറി ജയം; കോൺ​ഗ്രസ് വിമതൻ നേടിയത് 207 വോട്ടുകൾ

By സമകാലിക മലയാളം ഡെസ്‌ക്‌  |   Published: 22nd January 2021 08:46 AM  |  

Last Updated: 22nd January 2021 02:05 PM  |   A+A-   |  

kalamassery LDF

കളമശ്ശേരിയില്‍ എല്‍ഡിഎഫ് പ്രവര്‍ത്തകരുടെ ആഹ്ലാദ പ്രകടനം/ആല്‍ബിന്‍ മാത്യു

 

കൊച്ചി: കളമശേരി ന​ഗരസഭ 37ാം വാർഡിൽ നടന്ന ഉപതെരഞ്ഞെടുപ്പിൽ എൽഡിഎഫിന് അട്ടിമറി വിജയം. എൽഡിഎഫ് സ്വതന്ത്ര സ്ഥാനാർത്ഥി റഫീഖ് മരയ്ക്കാർ വിജയിച്ചു. 308 വോട്ടുകൾ നേടി  64 വോട്ടിന്റെ ഭൂരിപക്ഷത്തിനാണ് റഫീഖ് മരയ്ക്കാർ വിജയിച്ചത്. 

യുഡിഎഫിനായി മുസ്ലിം ലീ​ഗ് സ്ഥാനാർത്ഥി സമീലാണ് മത്സരിച്ചത്. അദ്ദേഹത്തിന് 244 വോട്ടുകളാണ് ലഭിച്ചത്. കോൺ​ഗ്രസ് വിമതനായി മത്സരിച്ച ഷിബു സിദ്ദിഖ് 207 വോട്ടുകൾ പിടിച്ചത് നിർണായകമായി. ലീ​ഗിന്റെ സിറ്റിങ് സീറ്റിലാണ് റഫീഖ് അട്ടിമറി വിജയം പിടിച്ചത്.

ഇതോടെ 21 സീറ്റുകളിൽ യുഡിഎഫും 20 സീറ്റുകളിൽ എൽഡിഎഫും എന്ന നിലയിലായി ന​ഗരസഭയിലെ ബലാബലം. കളമശേരി ന​ഗരസഭാ ഭരണത്തെ സ്വാധീനിക്കുന്ന ഫലമാണ് റഫീഖ് മരയ്ക്കാറുടെ അട്ടിമറി വിജയത്തിലൂടെ സംഭവിച്ചിരിക്കുന്നത്. 

ഇപ്പോൾ വിട്ടുനിൽക്കുന്ന വിമതർ തങ്ങൾക്കൊപ്പം ചേരുമെന്ന പ്രതീക്ഷയിലാണ് എൽഡിഎഫ്. അങ്ങനെ സംഭവിച്ചാൽ ഭരണം പിടിക്കാമെന്ന ആത്മവിശ്വാസവും എൽഡിഎഫിനുണ്ട്. നിലവിൽ നറുക്കെടുപ്പിലൂടെ യുഡിഎഫിനാണ് ഇവിടെ ഭരണം ലഭിച്ചത്.