കൽപ്പറ്റ: കൃഷിയിടത്തിലെ വൈദ്യുതി വേലിയിൽ നിന്നു ഷോക്കേറ്റ് യുവാവ് മരിച്ചു. സുൽത്താൻ ബത്തേരി കല്ലൂർ തിരുവണ്ണൂർ അലിയുടെ മകൻ മുഹമ്മദ് നിസാം (27) ആണ് മരിച്ചത്. തിങ്കളാഴ്ച പുലർച്ചെയായിരുന്നു അപകടം.
സ്വകാര്യ വ്യക്തിയുടെ കൃഷിയിടത്തിന് ചുറ്റും സ്ഥാപിച്ച വൈദ്യുതി വേലിയിൽ നിന്നാണ് യുവാവിന് ഷോക്കേറ്റത്. വനത്തിനടുത്തുള്ള പ്രദേശമായതിനാൽ വന്യമൃഗങ്ങളെ ചെറുക്കുന്നതിനായാണ് വേലി സ്ഥാപിച്ചത്.
മരിച്ചയാൾ മണൽക്കടത്തിന്റെ സംഘത്തിന്റെ സഹായിയായി പ്രവർത്തിക്കുകയായിരുന്നുവെന്ന് പൊലീസ് പറയുന്നു. പൊലീസ് വാഹനം കണ്ട് സമീപത്തെ തോട്ടത്തിലേക്ക് മാറിയപ്പോൾ ഷോക്കടിച്ചതായിരിക്കുമെന്നുമാണ് പൊലീസ് സംശയിക്കുന്നത്.
അതേസമയം അനധികൃതമായാണ് വേലിയിൽ വൈദ്യുതി കണക്ഷൻ നൽകിയതെന്നാണ് പൊലീസിന്റെ പ്രാഥമിക നിഗമനം. സുൽത്താൻ ബത്തേരി പൊലീസ് സ്ഥലത്തെത്തി നടപടികൾ പൂർത്തിയാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
