മുന്‍ഗണനാ റേഷന്‍ കാര്‍ഡ്; തിരുത്താന്‍ നാളെ അവസാന ദിനം; അനര്‍ഹരെ പിടിക്കാന്‍ വീട്ടിലെത്തും

By സമകാലിക മലയാളം ഡെസ്‌ക്‌  |   Published: 29th June 2021 09:18 AM  |  

Last Updated: 29th June 2021 09:18 AM  |   A+A-   |  

free ration

പ്രതീകാത്മക ചിത്രം

 

കൊച്ചി: അനർഹമായി റേഷൻ കാർഡ് മുൻഗണനാ പട്ടികയിൽ തുടരുന്നവർക്ക് സ്വയം പിന്മാറാനുള്ള അവസരം ബുധനാഴ്ച അവസാനിക്കും. ഇത്തരം കാർഡ് കൈവശമുള്ളവർ താലൂക്ക്, സിറ്റി റേഷനിംഗ് ഇൻസ്പെക്ടർക്ക് സത്യവാങ്മൂലവും അപേക്ഷയും സമർപ്പിച്ച് മുൻഗണനേതര വിഭാഗത്തിലേക്ക് സ്വയം മാറണം. 

ജൂൺ 30ന് ശേഷം പട്ടികയിൽ തുടരുന്ന അനർഹർക്കെതിരെ കർശന നിയമനടപടികൾ സ്വീകരിക്കുമെന്ന് സിവിൽ സപ്ലൈസ് വകുപ്പ് അറിയിച്ചിട്ടുണ്ട്. അതിനിടയില്‍ കോട്ടയം ജില്ലയില്‍ ഉള്‍പ്പെടെ അനധികൃതമായി റേഷന്‍ കാര്‍ഡ് കൈവശം വെച്ചിരിക്കുന്നവരെ തേടി അധികൃതര്‍ വീട്ടിലേയ്ക്ക് എത്തി തുടങ്ങി. തിങ്കളാഴ്ച ജില്ല സപ്ലേ ഓഫീസറുടെ നേതൃത്വത്തില്‍ ഇങ്ങനെ നടത്തിയ പരിശോധനയില്‍ തന്നെ 40ഓളം അനധികൃത കാര്‍ഡുകള്‍ കണ്ടെത്തി. 

സർക്കാർ/ അർദ്ധസർക്കാർ ജീവനക്കാർ, പൊതുമേഖല/ സഹകരണ സ്ഥാപനങ്ങളിലെ ജീവനക്കാർ, അദ്ധ്യാപകർ, സർവീസ് പെൻഷൻകാർ എന്നിവർ റേഷൻ ഐ.എ.വൈ/ പി.എച്ച്.എച്ച് ആനുകൂല്യങ്ങൾക്ക് അർഹരല്ല. ആദായനികുതി അടയ്ക്കുന്നവർ, പ്രതിമാസം 25000 രൂപയ്ക്ക് മുകളിൽ വരുമാനം ഉള്ളവർ, സ്വന്തമായി ഒരേക്കറിന് മുകളിൽ ഭൂമിയുള്ളവർ, സ്വന്തമായി 1000 ചതുരശ്ര അടിക്കുമുകളിൽ വിസ്തീർണമുള്ള വീട്/ ഫ്ലാറ്റ് ഉള്ളവർ, നാലുചക്രവാഹനം സ്വന്തമായി ഉള്ളവർ, വിദേശജോലിയിൽ നിന്നൊ സ്വകാര്യ സ്ഥാപനങ്ങളിലെ ജോലിയിൽ നിന്നൊ 25000 രൂപയിലധികം പ്രതിമാസവരുമാനമുള്ളവർ ഉള്ള കുടുംബം എന്നിവരാണ് മുൻഗണനയ്ക്ക് അർഹതയില്ലാത്തവരായി സർക്കാർ കണക്കാക്കുന്നത്.