കൊച്ചി : കേരളത്തില്‍ ബിജെപി അധികാരത്തിലെത്തുമെന്ന് മെട്രോ മാന്‍ ഇ ശ്രീധരന്‍. സംസ്ഥാനത്തെ ഏത് മണ്ഡലത്തിലും മല്‍സരിക്കാന്‍ തയ്യാറാണ്. പൊന്നാനിക്ക് സമീപം വേണമെന്നാണ് ആഗ്രഹം. നാമനിര്‍ദേശ പത്രിക സമര്‍പ്പിക്കുന്നതിന് മുമ്പ് ഡിഎംആര്‍സിയില്‍ നിന്നും രാജിവെക്കുമെന്നും ഇ ശ്രീധരന്‍ പറഞ്ഞു.
പാലാരിവട്ടം പാലം പുനര്‍ നിര്‍മ്മാണ പുരോഗതി വിലയിരുത്താനെത്തിയ ശ്രീധരന്‍ മാധ്യമങ്ങളോട് സംസാരിക്കവെയാണ് ഇക്കാര്യം വ്യക്തമാക്കിയത്. രാഷ്ട്രീയക്കാരനായല്ല, ടെക്‌നോക്രാറ്റായാകും പ്രവര്‍ത്തിക്കുക. പാലാരിവട്ടം പാലം ഒരു സന്ദേശമാണ്. ആ സന്ദേശം ഈ തെരഞ്ഞെടുപ്പില്‍ ഉണ്ടാകും. ഡിഎംആര്‍സി യൂണിഫോം ധരിക്കുന്ന അവസാന ദിവസമാണിത് എന്നും ശ്രീധരന്‍ പറഞ്ഞു.
പാലാരിവട്ടം മേല്‍പ്പാലം പുനര്‍ നിര്‍മ്മാണ ജോലി നാളെ പൂര്‍ത്തിയാകുമെന്ന് ഇ ശ്രീധരന്‍ അറിയിച്ചു. നാളെയോ മറ്റന്നാളോ പാലം റോഡ്‌സ് ആന്റ് ബ്രിഡ്ജസ് കോര്‍പ്പറേഷന് ഔദ്യോഗികമായി കൈമാറും. പാലം പൊതുജനങ്ങള്‍ക്ക് എന്നു തുറന്നുകൊടുക്കണമെന്ന് തീരുമാനിക്കേണ്ടത് കേരള സര്‍ക്കാരാണെന്നും ഇ ശ്രീധരന്‍ പറഞ്ഞു.
പാലം പണി വളരെ പെട്ടെന്ന് പൂര്‍ത്തിയാക്കാനായതില്‍ വളരെ സന്തോഷമുണ്ട്. പണി ഇത്രവേഗം പൂര്‍ത്തിയാക്കിയതിന് ഊരാളുങ്കല്‍ സൊസൈറ്റിക്ക് നന്ദി പറയുന്നു. നാട്ടുകാര്‍ക്ക് ഈ പാലം എത്രയും വേഗം പണി പൂര്‍ത്തീകരിച്ച് ഉപയോഗപ്രദമാക്കണം എന്ന ഉറ്റ ഉദ്ദേശം മൂലമാണ് ഡിഎംആര്‍സി പാലം പുനര്‍ നിര്‍മ്മാണം ഏറ്റെടുത്തത്. അല്ലാതെ പണം ഉണ്ടാക്കാനുള്ള ലക്ഷ്യത്തോടെയല്ല എന്നും ഇ ശ്രീധരന്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
