കോട്ടയം: നര്ക്കോട്ടിക് ജിഹാദ് പരാമര്ശത്തില് പാലാ ബിഷപ്പ് മാര് ജോസഫ് കല്ലറങ്ങാട്ടിനെ പിന്തുണച്ച് എല്ഡിഎഫ് ഘടകക്ഷിയായി കേരള കോണ്ഗ്രസ് എം. മയക്കുമരുന്ന് എന്ന സാമൂഹ്യവിപത്ത് ചൂണ്ടിക്കാട്ടുകയും അതിനെതിരെ ജാഗ്രതാ നിര്ദ്ദേശം നല്കുകയുമാണ് ബിഷപ്പ് ചെയ്തതെന്ന് പാര്ട്ടി ചെയര്മാന് ജോസ് കെ മാണി പറഞ്ഞു. പാലാ ബിഷപ്പിന്റെ വാക്കുകള് വളച്ചൊടിച്ച് ഉപയോഗിക്കുന്നത് സമൂഹത്തിന്റെ പൊതുവായ താല്പര്യങ്ങള്ക്ക് വിപരീതമാണെന്നും അദ്ദേഹം കൂട്ടിച്ചേര്ത്തു.
സാമൂഹ്യ തിന്മകള്ക്ക് എതിരെ വിശ്വാസികളെയും പൊതുസമൂഹത്തെയും ബോധവല്ക്കരിക്കാനുള്ള ഉത്തരവാദിത്വം എക്കാലവും സഭാനേതൃത്വം നിര്വഹിച്ചിട്ടുണ്ട്. സ്ത്രീധനം, ജാതിവിവേചനം തുടങ്ങിയ ദുരാചാരങ്ങള്ക്ക് എതിരായി രൂപപ്പെട്ട ചെറുത്തുനില്പ്പ് ലഹരി മാഫിയകള്ക്ക് എതിരെയും രൂപപ്പെടണം. അതിന് സഹായകരമായ ആഹ്വാനത്തിന്റെ പേരില് അദ്ദേഹത്തെ ആക്ഷേപിക്കുന്നവര് കേരളത്തിന്റെ മത സാഹോദര്യവും സമാധാന അന്തരീക്ഷവുമാണ് തകര്ക്കാന് ശ്രമിക്കുന്നത്. ഈ പ്രവണത എതിര്ക്കപ്പെടേണ്ടതാണെന്നും ജോസ് കെ മാണി ആവശ്യപ്പെട്ടു.
മയക്കുമരുന്ന് കേരളീയ സമൂഹത്തിന്റെ ഏറ്റവും വലിയ ഭീഷണി എന്നതില് തര്ക്കമില്ല. കേരളം അഭിമാനകരമായ മതമൈത്രി പുലര്ത്തുന്ന നാടാണ്. വ്യത്യസ്ത മതവിഭാഗങ്ങള്ക്ക് ഇടയിലുള്ള സാഹോദര്യം നിലനിര്ത്താന് നാമെല്ലാവരും കൂട്ടായി ശ്രമിക്കുകയാണ് വേണ്ടതെന്നും ജോസ് കെ.മാണി പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ