കോട്ടയം: കടലാസ് പൊതി നൽകി ഐഫോൺ തട്ടിയെടുക്കാൻ ശ്രമിച്ച യുവാവ് പിടിയിൽ. കറൻസി നോട്ടുകളെന്ന വ്യാജേന കമ്പിളിപ്പിച്ച് 94,000 രൂപ വില വരുന്ന ഐഫോൺ സ്വന്തമാക്കാനായിരുന്നു ശ്രമം. കൊല്ലം ശൂരനാട് സ്വദേശിയായ 29കാരൻ വിഷ്ണുവാണ് അറസ്റ്റിലായത്.
ആലപ്പുഴ നീലംപേരൂർ സ്വദേശിയായ ഡോണിയെ പറ്റിച്ച് ഐഫോൺ നേടിയെടുക്കാനായിരുന്നു വിഷ്ണുവിന്റെ ശ്രമം. പഴയ സാധനങ്ങൾ വിൽക്കുന്ന ഓൺലൈൻ സൈറ്റ് വഴിയാണ് ഡോണി ഐഫോൺ വിൽപനയ്ക്കു വച്ചത്. പരസ്യം കണ്ടതോടെ വിഷ്ണു പദ്ധതി തയ്യാറാക്കി. ഫോൺ വാങ്ങാൻ താത്പര്യമുണ്ടെന്ന് പറഞ്ഞ് ഡോണിയെ വിളിച്ചുവരുത്തുകയായിരുന്നു. തിരുനക്കര ഭാഗത്തെ ഇടവഴിയിൽ വച്ച് ഫോൺ കൈമാറാമെന്ന് ധാരണയായി.
ഡോണിയുടെ കയ്യിൽനിന്നു ഫോൺ വാങ്ങിയ വിഷ്ണു കറൻസി നോട്ടുകളെന്ന വ്യാജേന കടലാസ് പൊതി നൽകി. പൊതി അഴിച്ചു നോക്കിയപ്പോഴാണ് വെള്ള പേപ്പറുകൾ അടുക്കിവച്ചത് കണ്ടത്. വിഷ്ണു രക്ഷപ്പെടാൻ ഓടിയെങ്കിലും നാട്ടുകാർ ചേർന്ന് പിടികൂടി. കോടതിയിൽ ഹാജരാക്കിയ യുവാവിനെ റിമാൻഡ് ചെയ്തു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
