തുടരന്വേഷണം തടയണം; ദിലീപിന്റെ ഹർജി ഇന്ന് ഹൈക്കോടതിയിൽ; എതിർപ്പുമായി ആക്രമിക്കപ്പെട്ട നടി 

കൊച്ചി: നടിയെ ആക്രമിച്ച കേസിലെ തുടരന്വേഷണം തടയണമെന്ന് ആവശ്യപ്പെട്ട് ദിലീപ് നൽകിയ ഹർജി ഇന്ന് ഹൈക്കോടതി വീണ്ടും പരി​ഗണിക്കും. ഹർജിയെ എതിർത്ത് ആക്രമിക്കപ്പെട്ട നടി രം​ഗത്തെത്തിയിരുന്നു. കേസിൽ കക്ഷി ചേർക്കണമെന്ന് ആവശ്യപ്പെട്ട നടി ഇന്ന് കോടതിയിൽ ഹർജി നൽകിയേക്കും. 

ദിലീപിന്റെ കേസിൽ കക്ഷി ചേരാൻ നടി കഴിഞ്ഞദിവസം അനുമതി തേടിയിരുന്നു. കേസിൽ സംവിധായകൻ ബാലചന്ദ്രകുമാറിന്റെ അടക്കം പുതിയ വെളിപ്പെടുത്തലുകൾ പുറത്തു വന്നിരിക്കുകയാണ്. ഇത് ഏറെ ​ഗൗരവകരമാണ്. ഈ സാഹചര്യത്തിൽ ദിലീപിന്റെ ഹർജിയിൽ തീരുമാനമെടുക്കും മുമ്പ് തന്റെ ഭാ​ഗം കൂടി കേൾക്കണമെന്നാണ് നടി ആവശ്യപ്പെടുന്നത്. 

വിചാരണ അവസാനഘട്ടത്തിലെത്തി നിൽക്കെ, വിചാരണ നീട്ടിക്കൊണ്ടു പോകാനും കള്ളത്തെളിവുകൾ ഉണ്ടാക്കി തന്നെ കുടുക്കാനുമാണ് തുടരന്വേഷണമെന്ന് ദിലീപ് ഹർജിയിൽ ആരോപിക്കുന്നു.  തുടരന്വേഷണത്തിന് മുതിർന്ന ഉദ്യോ​ഗസ്ഥരുടെ അനുമതി ഉണ്ടായിരുന്നില്ല. തുടരന്വേഷണം ആവശ്യപ്പെട്ട് അന്വേഷണസംഘം കോടതിയിൽ നൽകിയ റിപ്പോർട്ട് റദ്ദാക്കണമെന്നും ദിലീപ് ആവശ്യപ്പെടുന്നു.