കോഴിക്കോട്: ചില്ഡ്രന്സ് ഹോമില് നിന്ന് ആറ് പെണ്കുട്ടികളെ കാണാതായ സംഭവത്തില് ചൈല്ഡ് വെല്ഫെയര് കമ്മിറ്റി അടിയന്തര യോഗം വിളിച്ചു. 1ന് ചേരുന്ന അടിയന്തര യോഗത്തിലെ ചില്ഡ്രന്സ് ഹോമിലെ സുരക്ഷ ഉള്പ്പെടെയുള്ള കാര്യങ്ങള് ചര്ച്ച ചെയ്യും. അതിനിടെ മകളെ തിരികെ നല്കണമെന്ന് ആവശ്യപ്പെട്ട് ഒരു പെണ്കുട്ടിയുടെ അമ്മ ജില്ലാ കലക്ടര്ക്ക് അപേക്ഷ നല്കി. 26നു വൈകിട്ട് ഒളിച്ചോടിയ പെണ്കുട്ടികളെ കര്ണാടകയില്നിന്നും മലപ്പുറത്തുനിന്നുമാണ് പിടികൂടിയത്.
ഇക്കഴിഞ്ഞ ബുധനാഴ്ചയാണ് വെളളിമാട്കുന്ന് ചില്ഡ്രന്സ് ഹോമിലെ ആറ് പെണ്കുട്ടികളെ കാണാതായത്. പൊലീസ് അന്വേഷണത്തില് കാണാതായ ആറു പേരില് രണ്ടു കുട്ടികളെ ബംഗളൂരുവില് നിന്നും നാലു പേരെ മലപ്പുറം എടക്കരയില് നിന്നും കണ്ടെത്തി. ഇവര്ക്കൊപ്പമുണ്ടായിരുന്ന രണ്ട് യുവാക്കളെയും പൊലീസ് അറസ്റ്റ് ചെയ്തു. ബാലാവകാശ കമ്മീഷന് കുട്ടികളില് നിന്ന് വിശദമായ മൊഴി രേഖപ്പെടുത്തി. കോടതിയില് രഹസ്യമൊഴി നല്കിയ പെണ്കുട്ടികളെ ജുവനൈല് ജസ്റ്റിസിന് മുന്പാകെ ഹാജരാക്കി. അതിന് ശേഷം ഇവരെ പ്രത്യേക നിരീക്ഷണ കേന്ദ്രത്തിലേക്ക് മാറ്റി.
അറസ്റ്റിലായ കൊടുങ്ങല്ലൂര് സ്വദേശി ഫെബിന് റാഫി ഇന്നലെ പൊലീസ് സ്റ്റേഷനില് നിന്ന് ഇറങ്ങിയോടിയെങ്കിലും ഇയാളെ ഉടന് തന്നെ പിടികൂടി. ഇയാള്ക്ക് ഒപ്പം കൊല്ലം സ്വദേശി ടോം തോമസും അറസ്റ്റിലായിരുന്നു. അറസ്റ്റിലായ രണ്ട് പ്രതികളെയും 14 ദിവസത്തേക്ക് റിമാന്ഡ് ചെയ്തു.
മദ്യം നല്കി പീഡിപ്പിക്കാന് ശ്രമിച്ചെന്ന പെണ്കുട്ടികളുടെ മൊഴിയുടെ അടിസ്ഥാനത്തിലായിരുന്നു അറസ്റ്റ് . ഇവര്ക്കെതിരെ പോക്സോ വകുപ്പുകള് പ്രകാരവും ജുവനൈല് ജസ്റ്റിസ് ആക്ട് പ്രകാരവുമാണ് കേസ് രജിസ്റ്റര് ചെയ്തിരിക്കുന്നത്. യുവാക്കളെ ബംഗളുരുവിലെക്കുള്ള യാത്രാ മധ്യേ പരിചയപ്പെട്ടതാണെന്നാണ് പെണ്കുട്ടികളുടെ മൊഴി. സഹായിക്കാമെന്ന് വാഗ്ദാനം ചെയ്ത്, ബംഗലൂരുവിലെ ഹോട്ടലില് വച്ച് പീഡിപ്പിക്കാന് ശ്രമിക്കുകയായിരുന്നുവെന്നും പെണ്കുട്ടികള് പൊലീസിന് മൊഴി നല്കി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ