കൊച്ചി: മരണവിധി കാത്തു ജയിലില് കഴിയുന്നതിനിടെ, തന്നെ സഹായിക്കാന് ശ്രമിക്കുന്നവര്ക്ക് നന്ദി അറിയിച്ച് നിമിഷ പ്രിയയുടെ കത്ത്. തന്നെ രക്ഷിക്കുന്നതിനു വേണ്ടി ലോകത്തിന്റെ വിവിധ ഭാഗങ്ങളില് കഠിനാധ്വാനം ചെയ്യുന്നവര്ക്ക് നന്ദി അറിയിക്കുന്നു എന്നാണ് നിമിഷ കത്തില് പറയുന്നത്. ഇന്നലെ സമൂഹമാധ്യമങ്ങളിലൂടെ സേവ് നിമിഷപ്രിയ ആക്ഷന് കൗണ്സില് ഭാരവാഹികള്ക്കാണ് കത്ത് അയച്ചിരിക്കുന്നത്.
'ഞാന് നിമിഷപ്രിയ, ഈ യെമന് ജയിലില്നിന്ന് എന്റെ ജീവന് രക്ഷിക്കാനായി സഹായിക്കുന്ന വിദേശത്തും സ്വദേശത്തും ഉള്ള ഓരോ ബഹുമാനപ്പെട്ടവര്ക്കും, പ്രത്യേകമായി സേവ് നിമിഷപ്രിയ ആക്ഷന് കൗണ്സിലില് ചേര്ന്നു പ്രവര്ത്തിക്കുന്നവര്ക്കും എന്റെ ഹൃദയം നിറഞ്ഞ നന്ദി അര്പ്പിക്കുന്നു' ഇതാണ് കത്തിലുള്ളത്.
യെമന് പൗരനെ കൊലപ്പെടുത്തിയ കേസില് നിമിഷ പ്രിയയുടെ അപ്പീല് യെമന് കോടതി തള്ളിയിരുന്നു. പാലക്കാട് കൊല്ലങ്കോട് സ്വദേശിനിയാണ് നിമിഷ.
കൊലപാതം ആത്മരക്ഷാര്ഥമെന്നാണ് അപ്പീലില് നിമഷപ്രിയ വാദിച്ചത്. സ്ത്രീ എന്ന പരിഗണന നിമിഷയ്ക്ക് കിട്ടുമെന്നു പ്രതീക്ഷിക്കപ്പെട്ടെങ്കിലും അന്തിമ വിധി എതിരായി.
യെമന് പൗരന് തലാല് അബ്ദുമഹ്ദിയെ നിമിഷപ്രിയയും കൂട്ടുകാരിയും ചേര്ന്നു കൊലപ്പെടുത്തി മൃതദേഹം വീടിനുമുകളിലെ ജലസംഭരണിയില് ഒളിപ്പിച്ചു എന്നതാണ് കേസ്. 2017 ജൂലൈ 25നാണ് യെമന് പൗരനായ തലാല് കൊല്ലപ്പെട്ടത്. യെമനില് നഴ്സായി ജോലി ചെയ്യുന്നതിനിടെ സ്വന്തമായി ക്ലിനിക് തുടങ്ങാന് സഹായ വാഗ്ദാനവുമായി വന്ന തലാല് പാസ്പോര്ട്ട് പിടിച്ചെടുത്ത് നടത്തിയ ക്രൂര പീഡനമാണ് കൊലപാതകത്തിലേക്ക് നയിച്ചത് എന്നാണ് നിമിഷയുടെ വാദം.
യെമന്കാരിയായ സഹപ്രവര്ത്തക ഹനാന്റെയും മറ്റൊരു യുവാവിന്റെയും നിര്ദേശപ്രകാരം തലാലിന് അമിത ഡോസ് മരുന്നു കുത്തിവച്ചതു മരണത്തിന് ഇടയാക്കുകയായിരുന്നു. കീഴ്ക്കോടതിയാണ് നിമിഷയ്ക്കു വധശിക്ഷ വിധിച്ചത്. വധശിക്ഷ ശരിവച്ചാല് യെമന് പ്രസിഡന്റിന്റെ അധ്യക്ഷതയിലുള്ള സുപ്രീം ജുഡീഷ്യല് കൗണ്സിലിന്റെ പരിഗണനയ്ക്കു കേസ് സമര്പ്പിക്കാം. എന്നാല്, അവിടെ അപ്പീല് കോടതിയിലെ നടപടിക്രമങ്ങള് ശരിയായിരുന്നോ എന്നു പരിശോധിക്കുക മാത്രമാണു പതിവ്.
മാപ്പു നല്കാതെ തലാലിന്റെ കുടുംബം
കൊല്ലപ്പെട്ടയാളുടെ കുടുംബം പണം സ്വീകരിച്ച് മാപ്പ് നല്കിയാല് മാത്രമേ നിമിഷക്ക് ജീവിതത്തിലേക്ക് മടങ്ങി വരാനാകൂ. ഇതിനായി നടത്തിയ ശ്രമങ്ങള് വിജയിച്ചിരുന്നില്ല. കേസ് പരിഗണിച്ചപ്പോള് കൊല്ലപ്പെട്ടയാളുടെ ബന്ധുക്കളും നാട്ടുകാരും സനായിലെ കോടതിക്ക് മുന്പില് തടിച്ചു കൂടി പ്രതിഷേധം നടത്തിയിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ