ആറ്റുകാല്‍ പൊങ്കാല; 14കോടിയുടെ ഇന്‍ഷുറന്‍സ്, സുരക്ഷയ്ക്ക് 3,840 പൊലീസുകാര്‍
By സമകാലിക മലയാളം ഡെസ്‌ക്‌ | Published: 05th March 2023 08:41 PM |
Last Updated: 05th March 2023 08:41 PM | A+A A- |
ചിത്രം: എക്‌സ്പ്രസ്‌
തിരുവനന്തപുരം: ആറ്റുകാല്‍ പൊങ്കാല ഉത്സവം 14 കോടി രൂപയ്ക്ക് ഇന്‍ഷുര്‍ ചെയ്ത് ആറ്റുകാല്‍ ഭഗവതി ക്ഷേത്ര ട്രസ്റ്റ്. മുന്‍ വര്‍ഷങ്ങളിലെക്കാള്‍ കൂടുതല്‍ ഭക്തജനങ്ങള്‍ എത്തുമെന്നതിന്റെ അടിസ്ഥാനത്തിലാണ് ഇന്‍ഷുര്‍ ചെയ്തത്. പൊങ്കാലയ്ക്കിടെ ഭക്തര്‍ക്ക് എന്തെങ്കിലും അത്യാഹിതം ഉണ്ടായാല്‍ അവരുടെ ആവശ്യങ്ങള്‍ക്ക് ഈ തുക ചെലവഴിക്കാനാകും.
സുരക്ഷയ്ക്ക് 3840 പൊലീസുകാരെ വിന്യസിക്കും. ആദ്യഘട്ടത്തില്‍ നഗരത്തില്‍ നിന്ന് 750 പൊലീസുകാരെ ഡ്യൂട്ടിക്കായി നിയോഗിക്കും. ഉത്സവത്തിന്റെ അവസാന ഘട്ടത്തില്‍, മറ്റ് ജില്ലകളില്‍ നിന്നുള്ള 2,890 പൊലീസ് ഉദ്യോഗസ്ഥര്‍, ബറ്റാലിയനുകള്‍, പ്രത്യേക വിഭാഗങ്ങള്‍ എന്നിവരുള്‍പ്പെടെ കൂടുതല്‍ പുരുഷന്മാരെ ഡ്യൂട്ടിക്ക് നിയോഗിക്കുമെന്ന് സിറ്റി പോലീസ് പ്രസ്താവനയില്‍ അറിയിച്ചു.
സുരക്ഷാ ഒരുക്കങ്ങളും ക്രമീകരണങ്ങളും കമ്മീഷണര്‍ മേല്‍നോട്ടം വഹിക്കും. ഡെപ്യൂട്ടി കമ്മീഷണര്‍ (ലോ ആന്‍ഡ് ഓര്‍ഡര്‍) നടപടികള്‍ നിരീക്ഷിക്കും. 117 പിക്കറ്റ് പോയിന്റുകള്‍, 120 അടി പട്രോളിംഗ്, എട്ട് സ്ട്രൈക്കിങ് ഫോഴ്സ്, 10 സ്പെഷ്യല് സ്ട്രൈക്കിങ് ഫോഴ്സ്, നാല് ജീപ്പ് പട്രോളിംഗ്, നാല് ബൈക്ക് പട്രോളിംഗ് എന്നിവ പൊലീസ് സജ്ജമാക്കും. 24 മണിക്കൂറും പ്രവര്‍ത്തിക്കുന്ന പ്രധാന കണ്‍ട്രോള്‍ റൂമും പാടശ്ശേരിയിലും കിഴക്കേക്കോട്ടയിലും രണ്ട് അധിക കണ്‍ട്രോള്‍ റൂമുകളും സജ്ജീകരിക്കും.
ഉത്സവത്തോടനുബന്ധിച്ച് മൈക്രോഫോണ്‍ പ്രവര്‍ത്തിപ്പിക്കുന്നതിന് അനുമതി തേടണമെന്ന് സിറ്റി പൊലീസ് അറിയിച്ചു. 85 ഡെസിബെല്ലില്‍ താഴെ ശബ്ദം നിലനിര്‍ത്തുകയും രാത്രി 10 മണിക്ക് ശേഷം മൈക്കുകള്‍ ഓഫ് ചെയ്യുകയും വേണം. നിരോധിത മേഖലകളില്‍ മൈക്കുകള്‍ പ്രവര്‍ത്തിപ്പിക്കാന്‍ പാടില്ല.
പൊങ്കാല പ്രമാണിച്ച് കേരള വാട്ടര്‍ അതോറിറ്റി, ജലവിതരണത്തിലും മലിന ജലനിര്‍മാര്‍ജനത്തിനും പ്രത്യേക സൗകര്യങ്ങള്‍ സജ്ജമാക്കി. അടിയന്തര ആവശ്യങ്ങള്‍ക്കും പരാതി പരിഹാരത്തിനുമായി കണ്‍ട്രോള്‍ റൂമുകളും തുറന്നു. നഗരത്തില്‍ പൊങ്കാല നടക്കുന്ന പ്രദേശത്ത് ഓവര്‍ ഹെഡ് ടാങ്കുകള്‍ പ്രത്യേകമായി സജ്ജീകരിച്ച്, 24 മണിക്കൂറും കൂടുതലായി വേണ്ടി വരുന്ന ജല ഉപയോഗം കണക്കാക്കി മുന്‍കൂട്ടി നിറച്ചിട്ടുണ്ട്. ഇതിനായി അരുവിക്കര നിന്നും താല്‍ക്കാലിക അധിക ജലം പമ്പ് ചെയ്യാനുള്ള സംവിധാനവും ഏര്‍പ്പെടുത്തി. പൊങ്കാല പ്രദേശത്ത് 1350 അധിക കുടിവെള്ള ടാപ്പുകളും അമ്പതോളം ഷവറുകളും താല്‍ക്കാലികമായി ഘടിപ്പിച്ചിട്ടുണ്ട്. വാട്ടര്‍ അതോറിറ്റിയുടെ മൂന്നു ടാങ്കുകള്‍ മുഴുവന്‍ സമയവും സജ്ജമാക്കിയിട്ടുണ്ട്. ടാങ്കര്‍ ലോറി വെന്‍ഡിങ് പോയിന്റുകള്‍ 24 മണിക്കൂറും പ്രവര്‍ത്തിക്കും. ഐരാണിമുട്ടത്ത് പ്രത്യേക വെന്‍ഡിങ് പോയിന്റ് പുതുതായി സജ്ജമാക്കിയിട്ടുമുണ്ട്. എല്ലാ ഫയര്‍ ഹൈഡ്രന്റുകളും അറ്റകുറ്റപ്പണി ചെയ്ത് പ്രവര്‍ത്തന സജ്ജമാക്കി. അസിസ്റ്റന്റ് എന്‍ജിനീയര്‍മാരുടെ നേതൃത്വത്തില്‍ മൂന്ന് മേഖലകളിലായി 24മണിക്കൂറും പ്രവര്‍ത്തിക്കുന്ന സ്പെഷ്യല് സ്‌ക്വാഡ് പ്രവര്‍ത്തന സജ്ജമാക്കിയിട്ടുണ്ട്. അടിയന്തര അറ്റകുറ്റപ്പണികള്‍ക്കായി അഞ്ചു ബ്ലൂ ബ്രിഗേഡ് സംഘങ്ങള്‍ 24 മണിക്കൂറും സജ്ജമാക്കി. വാട്ടര്‍ അതോറിറ്റി വെള്ളയമ്പലം ആസ്ഥാനത്തെ കണ്‍ട്രോള്‍ റൂമില്‍ പരാതികള്‍ യഥാസമയം കൈകാര്യം ചെയ്യാന്‍ 24 മണിക്കൂറും പ്രത്യേക സംഘം സജ്ജമാണ്. ടോള്‍ ഫ്രീ നമ്പര്‍ 1916-ല്‍ വിളിച്ച് പരാതികള്‍ അറിയിക്കാം. ആറ്റുകാല്‍ ക്ഷേത്ര പരിസരത്ത് അതോറിറ്റിയുടെ പ്രത്യേക കണ്‍ട്രോള്‍ റൂം തുറന്നിട്ടുണ്ട്. പൊങ്കാല പ്രമാണിച്ചുള്ള വെള്ളയമ്പലത്തെ കണ്‍ട്രോള്‍ റൂം നമ്പര്‍ 8547697340.
സിവറേജ് സംബന്ധമായി, നഗരത്തിലെ സ്വീവര്‍ ലൈന്‍ നെറ്റ്വര്‍ക്ക് പ്രത്യേകമായി മേഖല തിരിച്ച് ബക്കറ്റ് ക്ലീനിങ്, ജെറ്റിങ് എന്നിവ ചെയ്ത് സുഗമമായ ഒഴുക്ക് ഉറപ്പാക്കിയിട്ടുണ്ട്. പമ്പ് ഹൗസുകളും പമ്പുകളും പരിശോധന നടത്തി പ്രവര്‍ത്തനക്ഷമത ഉറപ്പാക്കിയിട്ടുണ്ട്. സിവറേജിനെ സംബന്ധിച്ച പരാതികള്‍ കൈകാര്യം ചെയ്യാനും പരിഹരിക്കാനും പ്രത്യേക സ്‌ക്വാഡുകള്‍ രൂപീകരിച്ചിട്ടുണ്ട്. പരാതികള്‍ സ്വീകരിക്കാന്‍ പ്രത്യേകം കണ്‍ട്രോള്‍ റൂം തുറന്നു. നമ്പര്‍-0471-2479502
ഈ വാര്‍ത്ത കൂടി വായിക്കൂ ബ്രഹ്മപുരത്ത് മാലിന്യവുമായി എത്തിയ വാഹനങ്ങള്‍ തടഞ്ഞു; നാളെമുതല്‍ സമരം
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
