നീരജിന് 'വെള്ളിത്തിളക്കം', വയനാട്ടില്‍ ഇന്ന് ജനകീയ തിരച്ചില്‍; ഇന്നത്തെ അഞ്ച് പ്രധാന വാർത്തകൾ

ടോക്യോയില്‍ ചരിത്രമെഴുതി സ്വന്തമാക്കിയ ഒളിംപിക്‌സ് ജാവലിന്‍ സ്വര്‍ണം നിലനിര്‍ത്താന്‍ ഇന്ത്യയുടെ നീരജ് ചോപ്രയ്ക്ക് സാധിച്ചില്ല. പാകിസ്ഥാന്‍ താരം അര്‍ഷാദ് നദീം ഇത്തവണ സ്വര്‍ണം സ്വന്തമാക്കി. ഒളിംപിക് റെക്കോര്‍ഡോടെയാണ് താരത്തിന്റെ നേട്ടം. നീരജിന്റെ വെള്ളി സീസണ്‍ ബെസ്റ്റിലൂടെയാണ് താരം സ്വന്തമാക്കിയത്. ഇതുൾപ്പെടെ ഇന്നത്തെ അഞ്ച് പ്രധാന വാർത്തകൾ ചുവടെ:

ടോക്യോയില്‍ ചരിത്രമെഴുതി സ്വന്തമാക്കിയ ഒളിംപിക്‌സ് ജാവലിന്‍ സ്വര്‍ണം നിലനിര്‍ത്താന്‍ ഇന്ത്യയുടെ നീരജ് ചോപ്രയ്ക്ക് സാധിച്ചില്ല. പാകിസ്ഥാന്‍ താരം അര്‍ഷാദ് നദീം ഇത്തവണ സ്വര്‍ണം സ്വന്തമാക്കി. ഒളിംപിക് റെക്കോര്‍ഡോടെയാണ് താരത്തിന്റെ നേട്ടം. നീരജിന്റെ വെള്ളി സീസണ്‍ ബെസ്റ്റിലൂടെയാണ് താരം സ്വന്തമാക്കിയത്.

ഒറ്റ ശ്രമത്തിലെ ദൂരമാണ് പാരിസ് ഒളിംപിക്‌സില്‍ നീരജ് ചോപ്രയ്ക്ക് വെള്ളി മെഡല്‍ സമ്മാനിച്ചത്. ജാവലിന്‍ ത്രോയില്‍ രണ്ടാം ശ്രമത്തില്‍ താരം കണ്ടെത്തിയ 89.45 മീറ്റര്‍ ദൂരമാണ് വെള്ളി മെഡലിന് അര്‍ഹനാക്കിയത്. നീരജിന്റെ ആദ്യത്തേതും രണ്ടാം ശ്രമത്തിന് ശേഷമുള്ള നാലു ശ്രമങ്ങളും ഫൗളായിരുന്നു.

ഒളിംപിക്സ് പുരുഷ ഹോക്കിയിലെ ഇന്ത്യയുടെ വെങ്കല മെഡൽ നേട്ടത്തെ അഭിനന്ദിച്ച് പ്രധാന മന്ത്രി നരേന്ദ്ര മോദി. ഇന്ത്യന്‍ ടീം ക്യാപ്റ്റൻ ഹർമൻപ്രീത് സിങ്ങിനെ വിഡിയോ കോൾ ചെയ്താണ് പ്രധാനമന്ത്രി നരേന്ദ്ര മോദി അഭിനന്ദനം അറിയിച്ചത്. വിരമിക്കൽ പ്രഖ്യാപിച്ച മലയാളി താരം പി ആർ ശ്രീജേഷുമായും പ്രധാനമന്ത്രി സംസാരിച്ചു. ഭാവിയിലേക്കുള്ള ടീമിനെ വളർത്തിയെടുക്കുന്നതിൽ സഹായിക്കണമെന്നും പ്രധാനമന്ത്രി ആവശ്യപ്പെട്ടു.

ഉരുള്‍പൊട്ടലുണ്ടായ വയനാട്ടിലെ മുണ്ടക്കൈയിലും ചൂരല്‍മലയിലും ഇന്ന് ജനകീയ തിരച്ചില്‍ നടക്കും. ക്യാമ്പുകളിലും ബന്ധുവീടുകളിലും മറ്റും കഴിയുന്നവരെ കൂടി ഉള്‍പ്പെടുത്തിയാകും തിരച്ചില്‍. ദുരന്തത്തിന് ഇരകളായവരില്‍ തിരച്ചിലില്‍ പങ്കെടുക്കാന്‍ താല്‍പ്പര്യമുള്ളവരെ വാഹനങ്ങളില്‍ വീടുകള്‍ നിലനിന്ന സ്ഥലങ്ങളിലെത്തിക്കും. സുരക്ഷാ ഉദ്യോഗസ്ഥര്‍ക്കൊപ്പമാണ് ഇവരെ ദുരന്ത ഭൂമിയിലെത്തിക്കുക.

 കൊല്ലത്ത് സൈക്കിള്‍ യാത്രക്കാരനായ ബിഎസ്എന്‍എല്‍ റിട്ടയേഡ് ഡിവിഷനല്‍ എന്‍ജിനീയര്‍ സി പാപ്പച്ചന്റെ മരണം കൊലപാതകമെന്ന് തെളിയാന്‍ കാരണം മകളുടെ പരാതി. 'എന്റെ അച്ഛന്റെ മരണത്തില്‍ സംശയമുണ്ട്. അന്വേഷിക്കണം'- എന്ന മകളുടെ പരാതിയാണ് കേസില്‍ നിര്‍ണായകമായത്.