കേന്ദ്രസംഘം ഇന്ന് വയനാട്ടിൽ; മൊഴിയെടുക്കാൻ പൊലീസ്; ഇന്നത്തെ 5 പ്രധാന വാർത്തകൾ

സിനിമാ മേഖലയിൽ നിന്നും ഉയർന്ന ലൈം​ഗിക ആരോപണങ്ങളെക്കുറിച്ച് അന്വേഷിക്കാൻ സർക്കാർ വനിതാ പൊലീസ് ഓഫീസർമാർ ഉൾപ്പെടുന്ന പ്രത്യേക പൊലീസ് സംഘത്തെ നിയോ​ഗിച്ചിരിക്കുകയാണ്. സംഘത്തിൽ നാലു വനിതാ ഐപിഎസ് ഓഫീസർമാരുണ്ട്

വയനാട് ഉരുള്‍പൊട്ടല്‍ ദുരന്തത്തെക്കുറിച്ച് പഠിക്കാനായി നിയോഗിച്ച കേന്ദ്രസംഘം ഇന്ന് ജില്ലയിലെത്തും. കേന്ദ്ര ദുരന്ത നിവാരണ സേനയിലെ പ്രത്യേക സംഘമാകും ഉരുള്‍പൊട്ടല്‍ ബാധിത മേഖലയിലെത്തി പഠനം നടത്തുക. ദുരന്താനന്തര ആവശ്യങ്ങള്‍ കണക്കാക്കുന്നതിനായി വിദഗ്ധ സംഘത്തെ സംസ്ഥാന സര്‍ക്കാര്‍ നിയോഗിച്ചു.

അഷ്ടമി രോഹിണി തിരക്കിൽ ​ഗുരുവായൂർ ക്ഷേത്രം. പിറന്നാൾ ദിനത്തിൽ ഉണ്ണി കണ്ണനെ കാണാൻ പതിനായിരങ്ങളാണ് ​ഗുരുവായൂരിലേക്ക് ഒഴുകിയെത്തുന്നത്. ആറൻമുളയിൽ പ്രസിദ്ധമായ വള്ളസദ്യ ഇന്ന് നടക്കും

സിദ്ദിഖ് രാജിവെച്ചതിനെത്തുടര്‍ന്ന് പുതിയ ജനറല്‍ സെക്രട്ടറിയെ കണ്ടെത്താനായി താരസംഘടനയായ അമ്മയുടെ എക്‌സിക്യൂട്ടീവ് യോഗം നാളെ ചേരും. സംസ്ഥാന സര്‍ക്കാര്‍ നിയോഗിച്ച അന്വേഷണ സംഘം നാളെ യോഗം ചേരുന്നുണ്ട്. ആരോപണം ഉന്നയിച്ചവരുടെ മൊഴിയെടുക്കും

കഴക്കൂട്ടത്തു നിന്നു കാണാതായ അസം സ്വ​ദേശിയായ 13കാരിയെ തിരുവനന്തപുരത്ത് എത്തിച്ചു. ഇന്നലെ രാത്രി പത്തരയോടെയാണ് തലസ്ഥാനത്ത് എത്തിച്ചത്. കുട്ടിയെ വിശാഖപട്ടണത്തു നിന്നാണ് കണ്ടെത്തിയത്

നവവധുവിനെ ഭർതൃ ​ഗൃഹത്തിൽ തൂങ്ങി മരിച്ച നിലയിൽ കണ്ടെത്തി. ആലപ്പുഴ ലെജ്നത്ത് വാർഡിൽ താമസിക്കുന്ന ആസിയ (22) ആണ് മരിച്ചത്. നാല് മാസം മുൻപായിരുന്നു വിവാഹം