ഒരു കരയോ കടലോ ജീവിതം
ഒരു തിരയോ ചുഴിയോ ജീവിതം
ഒരു കരയില്‍ നില്‍ക്കുന്നേരം
ഒരു കടല്‍ നിന്നലറും പോലെ
ഒരു കടലിലിറങ്ങുന്നേരം
ഒരു തിരയായുയരും പോലെ
ഒരു തിരയില്‍ മറിയുന്നേരം
ഒരു ചുഴിയായ്ത്തീരും പോലെ
ഒരു ചുഴിയില്‍ താഴുന്നേരം
ഒരു ജീവിതമറിയും പോലെ
ഒരു കരയോ കടലോ ജീവിതം
ഒരു തിരയോ ചുഴിയോ ജീവിതം
ഒരു കരയേതറിവീലല്ലൊ
ഒരു കടലേതറിവീലല്ലൊ
ഒരു തിരയും ചുഴിയും പോലും
ഒരു തരിയുമറിഞ്ഞീലല്ലൊ
ഒരു കരയോ കടലോ ജീവിതം
ഒരു തിരയോ ചുഴിയോ ജീവിതം
ഒരു കരയായ് തെളിയുന്നേരം
ഒരു കടലായലറുന്നേരം
ഒരു തിരയായ് മറിയുന്നേരം
ഒരു ചുഴിയായ് ചുറ്റുന്നേരം
ഒരു ജീവിതമേതു തിരക്കഥ?
ഒരു കരയില്‍ കടല്‍ കണ്ടീടാന്‍
ഒരു കടലില്‍ തിര കണ്ടീടാന്‍
ഒരു തിരയില്‍ ചുഴി കണ്ടീടാന്‍
ഒരു ജീവിതമേതൊരു സ്വപ്നം
ഒരു കരയോ കടലാകുന്നു
ഒരു കടലോ തിരയാകുന്നു
ഒരു തിരയോ ചുഴിയാകുന്നു
ഒരു ജീവിതമെന്തൊരു മായ
ഒരു കടലോ കരയാകുന്നു
ഒരു തിരയോ കടലാകുന്നു
ഒരു ചുഴിയോ തിരയാകുന്നു
ഒരു ജീവിതമേതു രഹസ്യം
കരയെന്തെന്നറിയാതല്ലൊ
കടലെന്തെന്നറിയാതല്ലൊ
തിരയെന്തെന്നറിയാതല്ലൊ
ജീവിതമാടുന്നു മണ്ണില്‍
മരണക്കളിയാട്ടമിതൊക്കെ
ഒരു കരയില്‍ ജീവിതമുണ്ടോ
ഒരു കടലില്‍ ജീവിതമുണ്ടോ
ഒരു തിരയില്‍ ജീവിതമുണ്ടോ
ഒരു ചുഴിയില്‍ ജീവിതമുണ്ടോ
ഒരു ജീവിതമുത്തരമല്ല
ഒരു വലിയൊരു ചോദ്യം മാത്രം
ഒരു കരയോ കടലോ ജീവിതം
ഒരു തിരയോ ചുഴിയോ ജീവിതം
കരയും കടലും മായുന്നോ
തിരയും ചുഴിയും മായുന്നോ
മായുന്നോ ജീവിതചിത്രം
മറയുന്നൊരു കാഴ്ച കണക്കെ...
മറവികളായോര്‍മ്മകളായതു
പല വേഷങ്ങള്‍ കെട്ടുന്നു
മറവികളായോര്‍മ്മകളായതു
പല ഭാവങ്ങള്‍ നെയ്യുന്നു
ഒരു കരയോ കടലോ ജീവിതം
ഒരു തിരയോ ചുഴിയോ ജീവിതം
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
