ഹൈക്കു കവിതകള്‍- മൊയ്തു മായിച്ചാന്‍കുന്ന്  

1          
കോട്ടുവാ

പുലര്‍കാലം
മിണ്ടാതെ വരുന്ന കാറ്റിന്
മടിപിടിച്ചു
മരിച്ചവരുടെ കോട്ടുവാമണം

 2         
കൂട്ട്

മൈലാഞ്ചി ചെടി മാത്രം
അവളോടൊപ്പം
കുഴിമാടത്തില്‍ കിടന്നു.

3         
ഉരിയാടല്‍

വീട്ടുകാരനും വീടും
ഒന്നും ഉരിയാടുന്നില്ല
ചുമരിലെ സമയസൂചിയുടെ 
മിടിപ്പുകള്‍ മാത്രം.

4         
കണ്ണേറ്

പണിതുകൊണ്ടിരിക്കുന്ന
വീടിന് കണ്ണ് 
പതിയാതിരിക്കാന്‍
'ഠോ' എന്നെഴുതി.

5
തൊട്ടാവാടി

എന്തിനാണിങ്ങനെ
നാണം കുണുങ്ങുന്നു
ഈ നൂറ്റാണ്ടിലും.

6          
അറ്റം

പട്ടം പറത്തുന്ന കുട്ടി
ആകാശം തൊടാനാവാതെ 
നൂലറ്റം
വരെ.

7          
തുഴ

ഇക്കരെയുള്ള വള്ളം
അക്കരെയെത്താന്‍
എത്ര തുഴയണമെന്ന് 
പങ്കായത്തിനറിയില്ല.
          
8
കൊതുക്

മൂളിപ്പാട്ട്
മുഴുപ്പിക്കും മുമ്പേ
കയ്യടി.