'ഒപ്പമുള്ളാള്‍'- ശിവകുമാര്‍ അമ്പലപ്പുഴ എഴുതിയ കവിത
By ശിവകുമാര്‍ അമ്പലപ്പുഴ | Published: 25th August 2023 01:55 PM |
Last Updated: 25th August 2023 01:55 PM | A+A A- |
ഒപ്പമുണ്ടൊരാളെപ്പൊഴും
ഒത്തുതാനൂണുറക്കവും
തപ്പിയാലൊട്ടു കാണില്ല
തല്ലിയോടിയ്ക്ക ദുഷ്‌കരം
വെള്ളിയാഴ്ചസ്വപ്നങ്ങളില്‍
വെറുതെ കൂടെക്കിടക്കുന്നു
ഒപ്പമെപ്പോഴുമുള്ളയാള്‍
ഒട്ടിനില്‍പാണദൃശ്യമായ്
പാതിനിദ്രയില്‍ ഭാര്യയെ
പരതിയുമ്മവെച്ചീടവേ
പൂര്‍വ്വകാമുകിയൊരുവള്‍ തന്‍
പേര് നാവില്‍ തൊടുക്കുന്നു
പാസ്സുവേഡുള്ള ഗൂഗിളില്‍
പീസുസൈറ്റുകള്‍ തേടുന്നു
പാട്ടുപാടിയാല്‍ വരികളില്‍
പാരഡിബ്ഭരണി ചേര്‍ക്കുന്നു
ഒപ്പമെപ്പോഴുമുള്ളയാള്‍
ഒക്കെയും വെടക്കാക്കുന്നു
കുളിമുറിസ്സെല്‍ഫിയിന്‍സ്റ്റയില്‍
കളിയിലെന്നപോല്‍ പോസ്റ്റുന്നു
ഫ്‌ലഷ്ടാങ്കില്‍ നിഗൂഢമായ്
വിസ്‌കിബോട്ടിലുകള്‍ പൂഴ്ത്തുന്നു
സസ്യഭോജിക്ക് ഹോട്ടലില്‍
ചില്ലിബീഫോര്‍ഡര്‍ ചെയ്യുന്നു
വോട്ടു കുത്തവേ കൈവിരല്‍
നോട്ടബട്ടണില്‍ ചേര്‍ക്കുന്നു
മണ്ഡലം നോമ്പെടുത്തുദക
മണ്ഡലം യാത്രപോകുന്നു
ഒപ്പമെപ്പോഴുമുള്ളയാള്‍
ഒറ്റുകാരനാണെങ്കിലും
ഒട്ടുധ്യാനിച്ചും കിടയ്ക്കാത്ത
ഒറ്റവാക്കെന്റെ കവിതയില്‍
എപ്പൊഴാണെന്നറിയില്ല
എഴുതിവെച്ചിട്ടുപോകുന്നു
ഈ കവിത കൂടി വായിക്കൂ
'രാധികാ സാന്ത്വനം'- വിവര്‍ത്തന കവിത
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
