'സിംഹവേട്ട'- പ്രസാദ് രഘുവരന്‍ എഴുതിയ കവിത
By പ്രസാദ് രഘുവരന്‍ | Published: 01st June 2023 06:02 PM |
Last Updated: 01st June 2023 06:02 PM | A+A A- |
സിംഹമായിരുന്നു.
കാഴ്ചയില്‍ ശാന്തരൂപമെങ്കിലും
ശരിക്കും സിംഹമായിരുന്നു.
പാടമൂടിയ കാഴ്ചക്കാര്‍
എണ്ണത്തില്‍ക്കൂടുന്നു.
അവര്‍ക്ക് ഗര്‍ജ്ജനം മാത്രമാണ് സിംഹം!
താനൊഴുക്കിവിട്ട
രക്തപ്പുഴ കണ്ട്,
അപ്പുഴയില്‍ മുങ്ങിയോരുടെ
അലമുറ കേട്ട്,
ഒരു സിംഹം പണ്ടേയ്ക്കു പണ്ടേ
ശാന്തിമുദ്രയായതാണ്
സത്യമുദ്രയായതാണ്.
പാടമൂടിയ കാഴ്ചക്കാരേ,
നിങ്ങള്‍ക്കാ മുദ്ര അജ്ഞേയമാണ്.
ആ സത്യശാന്തിമുദ്രയുടെ നില്‍പ്പ്
സദാ നിങ്ങള്‍ക്ക് പുറന്തിരിഞ്ഞാണ്.
അതുകൊണ്ട് നിങ്ങളതിനെ
നിങ്ങള്‍ക്കുവേണ്ടി കുഴിച്ചുമൂടി.
ഒരൂന്നുവടിയും കുത്തി,
കണ്ണില്‍ കാരുണ്യവും
നെഞ്ചിലലിവും പേറി,
സ്ഥൈര്യമാര്‍ന്ന ചുവടുകളുമായി,
'തലമുറകള്‍ വിശ്വസിക്കാന്‍
മടിക്കുന്ന' മറ്റൊരു സിംഹം
ഈ മണ്ണിലൂടെ നടന്നിരുന്നു.
പാടമൂടിയ കാഴ്ചക്കാരേ,
നിങ്ങളാണാ ഹൃദയത്തില്‍
തുളകള്‍ വീഴ്ത്തിയത്.
പാടമൂടിയ കാഴ്ചക്കാരേ,
നിങ്ങള്‍ കാണുന്നതും
നിങ്ങള്‍ക്കറിയുന്നതും
നിങ്ങള്‍ വളര്‍ത്തുന്നതും
നിങ്ങള്‍ക്കായി വാ തുറന്നുപിടിച്ച
തരിമണല്‍സിംഹങ്ങളെ മാത്രമാണ്.
