'ഏകകക്ഷി ഭരണം പ്രളയകാലം വരെ നിലനില്‍ക്കില്ല'

ഈ ചോദ്യത്തിനു പിന്നിലുള്ള പ്രേരണ ഏകകക്ഷി ഭരണം പ്രളയകാലം വരെ നിലനില്‍ക്കുമെന്ന കണക്കുകൂട്ടലാണ്. ആ സ്ഥിതിവിശേഷം മാറാന്‍ തുടങ്ങിയിട്ട് പതിറ്റാണ്ടുകളോളം ആയിരിക്കുന്നു. 1957-ല്‍ തന്നെ കേരളത്തില്‍ ഒരു കോണ്‍ഗ്രസ് - ഇതര ഗവണ്‍മെന്റ് നിലവില്‍ വന്നു. ഒരു പതിറ്റാണ്ട് കഴിഞ്ഞപ്പോഴേക്ക് ഒരു ഡസനോളം സംസ്ഥാനങ്ങളില്‍ കോണ്‍ഗ്രസ്സിന് അധികാരം നഷ്ടപ്പെട്ടു. വീണ്ടും ഒരു പതിറ്റാണ്ട് കഴിഞ്ഞപ്പോഴേക്ക് കേന്ദ്രത്തില്‍ തന്നെ താല്‍ക്കാലികമായെങ്കിലും കോണ്‍ഗ്രസ് അധികാരഭ്രഷ്ടമായി. ഇപ്പോഴിതാ കോണ്‍ഗ്രസ്സിനു ഭരണം നഷ്ടപ്പെടുക മാത്രമല്ല, ആ പാര്‍ട്ടിയാകെ തകര്‍ച്ചയിലേക്കു നീങ്ങുകയാണ്. ഈ സ്ഥിതിവിശേഷത്തോട് പൊരുത്തപ്പെടാന്‍ കോണ്‍ഗ്രസ് നേതാക്കള്‍ തയ്യാറല്ല. അവരുടെ മനോഭാവമാണ് നിങ്ങളുടെ ചോദ്യത്തില്‍ പ്രതിഫലിച്ചു കാണുന്നത്. ഇന്നത്തെ രാഷ്ട്രീയ സാഹചര്യത്തില്‍ ഏകകക്ഷി ഭരണമോ, ബഹുകക്ഷി ഭരണമോ എന്ന പ്രശ്‌നം തന്നെ ഉദിക്കുന്നില്ല. ബഹുകക്ഷിഭരണം ഇന്നൊരു യാഥാര്‍ത്ഥ്യമായിരിക്കുന്നു. ഏതെല്ലാം പാര്‍ട്ടികള്‍ എന്നതുമാത്രമാണ് പ്രശ്‌നം.

നിങ്ങള്‍ സൂചിപ്പിച്ചതുപോലെ ഈ കുഴഞ്ഞുമറിഞ്ഞ സ്ഥിതിയില്‍നിന്ന് മുതലെടുക്കാന്‍ ബി.ജെ.പി ശ്രമിക്കും എന്നത് ശരിയാണ്. പക്ഷേ, അതു തടഞ്ഞു നിര്‍ത്താന്‍ കഴിയുമെന്ന് ദേവഗൗഡ ഗവണ്‍മെന്റും ഗുജ്‌റാള്‍ ഗവണ്‍മെന്റും തെളിയിച്ചിട്ടുണ്ട്.

കോണ്‍ഗ്രസ്സിന് പങ്കാളിത്തമില്ലാത്തതെങ്കിലും, കോണ്‍ഗ്രസ്സിന്റെ പിന്തുണയോടെ നിലനില്‍ക്കുന്ന കൂട്ടുകൃഷി ഗവണ്‍മെന്റ് അനിവാര്യമാണെന്ന യാഥാര്‍ത്ഥ്യത്തോട് പൊരുത്തപ്പെടാനാണ് എന്റെ പാര്‍ട്ടിയടക്കം ഇടതുപക്ഷ പാര്‍ട്ടികള്‍ ശ്രമിക്കുന്നത്. മറ്റുള്ള സംശയങ്ങള്‍ ഇന്നത്തെ രാഷ്ട്രീയ യാഥാര്‍ത്ഥ്യങ്ങളില്‍നിന്നും ഒളിച്ചോടാനുള്ള ശ്രമമാണ്. അതിന് ഞങ്ങള്‍ ഒരുക്കമല്ല.

ദേവഗൗഡയായാലും ഗുജ്‌റാളായാലും കോണ്‍ഗ്രസ്സിന്റേതല്ലാത്ത ഒരു ഗവണ്‍മെന്റാണ് വന്നത്. ഇത് ഒരുതരത്തില്‍ 'കോണ്‍ഗ്രസ്സിനോട് അടയറവുപറഞ്ഞുകൊണ്ടുള്ള'തായിരുന്നു എന്ന് ധരിക്കാം. ശരിയാണിത്. കോണ്‍ഗ്രസ്സിന് പങ്കാളിത്തമില്ലാത്ത, ഐക്യമുന്നണി ഗവണ്‍മെന്റിന് പിന്തുണ നല്‍കാന്‍ നിര്‍ബ്ബന്ധിക്കപ്പെട്ട കോണ്‍ഗ്രസ്സിന് ഐക്യമുന്നണിയോട് അടിയറവുപറയേണ്ടി വന്നു എന്നതാണ് യഥാര്‍ത്ഥത്തില്‍ ശരി.

എല്ലാം തികഞ്ഞ ഒരു ഭരണമാണിതെന്ന് ഇടതുപക്ഷ മുന്നണി അവകാശപ്പെടുന്നില്ല. പക്ഷേ, പരിമിതികള്‍ക്കു വിധേയമായി നല്ല ഭരണം കാഴ്ചവെയ്ക്കാന്‍ ഈ ഗവണ്‍മെന്റിനു കഴിയുന്നുണ്ട്. മന്ത്രിമാര്‍ അഴിമതിക്കാരല്ലെന്നെങ്കിലും പറയാന്‍ എതിരാളികള്‍ നിര്‍ബന്ധിക്കപ്പെട്ടിരിക്കുന്നില്ലേ.

സംസ്ഥാനങ്ങള്‍ തമ്മിലുള്ള അതിര്‍ത്തിതര്‍ക്കം, ജലവിഭവങ്ങളുടെ ഉപയോഗം മുതലായവയുടെ കാര്യത്തില്‍ ബന്ധപ്പെട്ട സംസ്ഥാനങ്ങള്‍ തമ്മില്‍ കൂടിയാലോചന നടത്തുകയാണ് വേണ്ടതെന്നതാണ് അവിഭക്ത കമ്യൂണിസ്റ്റ് പാര്‍ട്ടിയുടേയും ഇന്ന് സി.പി.ഐ.എമ്മിന്റേയും നിലപാട്. ആ അടിസ്ഥാനത്തിലാണ് ഞാന്‍ മുഖ്യമന്ത്രിയായിരുന്ന കാലത്ത് തമിഴ്നാടുമായി ചില ധാരണകളില്‍ എത്തിയത്. അത് തികച്ചും ശരിയായിരുന്നെന്ന് ഇന്നും ഞാന്‍ വിശ്വസിക്കുന്നു. ആ സമീപനത്തോട് മുല്ലപ്പെരിയാര്‍ പ്രശ്‌നവും ഇരു സംസ്ഥാന ഗവണ്‍മെന്റുകളും തമ്മിലുള്ള സംവാദത്തിലൂടെ പരിഹരിക്കാന്‍ കഴിയുമെന്നാണ് ഞാന്‍ വിശ്വസിക്കുന്നത്. ഇതില്‍ 'സി.പി.ഐ.എമ്മിനുള്ളിലെ സംഘര്‍ഷത്തിന്റെ സൂചന' കാണുന്നത് 'ക്ഷീരമുള്ളോരകിടിന്‍ ചുവട്ടിലും ചോര തന്നെ കൊതുകിന് കൗതുകം' എന്ന മനോഭാവത്തിന്റെ പ്രകടനമാണ്.

പ്രീഡിഗ്രി ബോര്‍ഡ് മുന്‍ ഗവണ്‍മെന്റ് ഏര്‍പ്പെടുത്താന്‍ ശ്രമിച്ചത് വിദ്യാഭ്യാസ രംഗം വിവിധ ജാതിമത വിഭാഗങ്ങളില്‍പ്പെട്ട സ്വകാര്യമാനേജുമെന്റുകള്‍ക്ക് പങ്കുവെയ്ക്കുന്നതിനു വേണ്ടിയായിരുന്നു. ഇപ്പോഴത്തെ പ്ലസ് ടുവിലാകട്ടെ വിദ്യാഭ്യാസ മേഖലയില്‍ കോളേജുകളും സ്‌കൂളുകളും തമ്മിലുള്ള ബന്ധത്തിന്റെ അലകും പിടിയും മാറ്റാനുള്ള ശ്രമമാണ്. സ്‌കൂള്‍ നിലവാരത്തില്‍ തൊഴില്‍ വിദ്യാഭ്യാസത്തിന് ഊന്നല്‍ നല്‍കിക്കൊണ്ട് കോളേജ് വിദ്യാഭ്യാസം ഗവേഷണ പ്രധാനമാക്കാന്‍ നടത്തുന്ന ശ്രമമാണ് പ്ലസ് ടു എന്ന് ഞാന്‍ കരുതുന്നു.

പ്രത്യേകിച്ചാരേയും സംതൃപ്തിപ്പെടുത്താനൊന്നും ഇടതുപക്ഷ ജനാധിപത്യമുന്നണി ഗവണ്‍മെന്റ് ലക്ഷ്യമിടുന്നില്ല. പ്ലസ് ടുവിന്റെ കാര്യം യഥാര്‍ത്ഥ ലക്ഷ്യം സ്‌കൂള്‍തലത്തിലെ പുസ്തക പ്രധാനമായ അദ്ധ്യാപനത്തിനു പകരം തൊഴില്‍ പരിശീലന പ്രധാനമായ അദ്ധ്യാപനം തുടങ്ങിവെക്കാനാണ്. ആ നീക്കത്തിന്റെ ഉദ്ദേശത്തെപ്പറ്റി എന്തെല്ലാം ദുരാരോപണം നടത്തിയാലും വിദ്യാഭ്യാസരംഗത്ത് വിപ്ലവകരമായ മാറ്റം വരുത്തുന്നതിന്റെ തുടക്കമാണിത്. ഇതില്‍ യാതൊരു സംശയത്തിന്റേയും ആവശ്യമില്ല.

ജനകീയാസൂത്രണയത്‌നത്തിന്റെ ഫലമായി പഞ്ചായത്തുകള്‍ക്കും നഗരസഭകള്‍ക്കും ഇതേവരെയില്ലാത്ത അധികാരവും ധനവിഭവങ്ങളും കിട്ടുന്നു എന്നതാണ് യാഥാര്‍ത്ഥ്യം. അതവര്‍ക്കു കിട്ടുന്നതിനെ എതിര്‍ക്കുന്നവര്‍ മാത്രമേ ജനകീയാസൂത്രണത്തെക്കുറിച്ച് അപവാദം പറഞ്ഞുപരത്തുകയുള്ളു. എല്ലാ പാര്‍ട്ടികളും പങ്കെടുക്കുന്ന പഞ്ചായത്തുകള്‍ക്കും നഗരസഭകള്‍ക്കും അധികാരവും ധനവിനിയോഗവും കിട്ടുന്നത് സി.പി.എം പങ്കാളിത്തമാണെന്ന് പറയുന്നത് വിചിത്രമാണ്.

വിദേശയാത്രകള്‍ മുഴുവന്‍ ഉല്ലാസയാത്രകളാണെന്ന ധാരണ ശരിയല്ല. ഇപ്പോള്‍ ഇടതുപക്ഷ ജനാധിപത്യമുന്നണി ഗവണ്‍മെന്റ് അധികാരത്തില്‍ വന്നതില്‍ പിന്നീട് മന്ത്രിമാര്‍ നടത്തിയ വിദേശയാത്രകളുടെ ഫലമെന്തെന്ന് ആ യാത്രകള്‍ നടക്കുമ്പോള്‍ തന്നെ പത്രങ്ങളില്‍ പ്രസിദ്ധീകരിച്ചിട്ടുണ്ട്. മുഖ്യമന്ത്രിയും വൈദ്യുതി മന്ത്രിയും ഇപ്പോള്‍ നടത്തുന്ന വിദേശയാത്രയെ സംബന്ധിച്ച കാര്യങ്ങള്‍ പത്രങ്ങളില്‍ വരുന്നുണ്ട്. കേരളത്തിന്റെ താല്പര്യങ്ങളില്‍ സംരക്ഷിക്കാന്‍ പറ്റുന്ന പലതും നടക്കുന്നുണ്ടെന്നും പത്രങ്ങളില്‍ വരുന്ന വാര്‍ത്തകളില്‍ തന്നെ കാണാം.

'സാഹിത്യം പോലെ സര്‍ഗ്ഗാത്മകമായ മേഖലകളില്‍ രാഷ്ട്രീയമായ ഇടപെടല്‍' ആരിഷ്ടപ്പെട്ടാലും ആര്‍ക്കിഷ്ടക്കേടുണ്ടായാലും സമൂഹത്തില്‍ നടക്കും. എന്തുകൊണ്ടെന്നാല്‍ ആശയപ്രപഞ്ചത്തിന്റെ ഭാഗമാണ് സാഹിത്യം. ആശയപ്രപഞ്ചമാകട്ടെ ഓരോ സമൂഹത്തിലും ഭരിക്കുന്നവരും ഭരിക്കപ്പെടുന്നവരും രൂപപ്പെടുത്തുന്ന 'ആശയങ്ങളുടെ സംഘടനത്തിനുള്ള വേദിയാണ്. രാഷ്ട്രീയത്തിന്നതീതമായ സാഹിത്യത്തെക്കുറിച്ചും മറ്റും പുരപ്പുറത്തു കയറിനിന്നു പ്രസംഗിക്കുന്നവര്‍ ഭരണവര്‍ഗ്ഗ രാഷ്ട്രീയത്തെ സാഹിത്യത്തില്‍ ഇടപെടുവിക്കുകയാണ് ചെയ്യുന്നത്.

കഴിഞ്ഞ തവണ ശങ്കര്‍ദയാല്‍ ശര്‍മ്മയെ പ്രസിഡന്റും, നാരായണനെ വൈസ് പ്രസിഡന്റുമാക്കി നിശ്ചയിച്ചപ്പോള്‍ തന്നെ ഇത്തവണ നാരായണനെ പ്രസിഡന്റാക്കുമെന്ന ധാരണയുണ്ടായിരുന്നു. ആ ധാരണയും മറികടക്കാന്‍ കോണ്‍ഗ്രസ് ശ്രമിച്ചില്ലെന്നതില്‍ എനിക്ക് സന്തോഷമുണ്ട്.

പ്രായവും രോഗങ്ങളും നിമിത്തം മുന്‍കാലത്തെപ്പോലെ പ്രവര്‍ത്തിക്കാന്‍ കഴിയാത്തതില്‍ തീര്‍ച്ചയായും എനിക്കു ദുഃഖമുണ്ട്. പക്ഷേ, ഇന്നു ചെയ്യുന്നതു പോലെ പൊതുവേദികളിലെത്താതെ തന്നെ ജനസേവനം നടത്തിക്കൊണ്ട് ഏതാനും വര്‍ഷം കൂടി ജീവിക്കാന്‍ കഴിഞ്ഞാല്‍ അതില്‍ ഞാന്‍ സംതൃപ്തനാകും.