വാഷിങ്ടണ്‍: വ്യോമസേനാംഗമായിരുന്ന സമയത്ത് താന്‍ ലൈംഗികാതിക്രമത്തിന് ഇരയായിട്ടുണ്ടെന്ന് അമേരിക്കന്‍ സെനറ്റര്‍ മാര്‍ത്ത മക്‌സെല്ലിയുടെ വെളിപ്പെടുത്തല്‍. അമേരിക്കയിലെ ആദ്യ വനിതാ യുദ്ധ വിമാന പൈലറ്റാണ് മാര്‍ത്ത. പൈലറ്റായിരുന്ന സമയത്ത് തന്റെ മേലുദ്യോഗസ്ഥന്‍ ബലാത്സംഗം ചെയ്യുകയായിരുന്നുവെന്ന് അവര്‍ വെളിപ്പെടുത്തി. സൈന്യത്തിലെ ലൈംഗികാതിക്രമങ്ങള്‍ തടയുക ലക്ഷ്യമിട്ട് യുഎസ് സെനറ്റ് നടത്തുന്ന വാദങ്ങള്‍ക്കിടെയാണ് അവര്‍ അനുഭവങ്ങള്‍ തുറന്നു പറഞ്ഞത്.
'ആ സമയത്ത് എനിക്ക് സ്വയം അപമാനം തോന്നി, നാണക്കേട് തോന്നി, ഞാനാകെ ആശയക്കുഴപ്പത്തിലായി. സൈന്യത്തിന്റെ അതിക്രമത്തിന് ഇരയായ മറ്റുള്ളവരെ പോലെ ഞാനും അന്ന് ഇതിനെക്കുറിച്ച് മിണ്ടാതിരുന്നു. കാരണം ഈ വ്യവസ്ഥിതിയില്‍ എനിക്ക് വിശ്വാസമുണ്ടായിരുന്നില്ല. 18 വര്‍ഷത്തെ സേവനത്തിന് ശേഷം ഇപ്പോള്‍ വ്യോമസേനയില്‍ നിന്ന് വിരമിച്ചു. പക്ഷേ ഇവിടുത്തെ വ്യവസ്ഥിതി എന്നെ വീണ്ടും വീണ്ടും ബലാത്സംഗം ചെയ്യുകയാണിപ്പോഴും. ലൈംഗികാതിക്രമങ്ങള്‍ക്കെതിരായുള്ള പോരാട്ടത്തിന്റെ പാതയിലാണ് ഞാനിപ്പോള്‍'- അവര്‍ വ്യക്തമാക്കി.
സൈന്യത്തിലെ ലൈംഗികാതിക്രമങ്ങള്‍ക്കിരയാവുന്നവര്‍ക്ക് വേണ്ടി പ്രവര്‍ത്തിക്കാനുള്ള ഒരുക്കത്തിലാണെന്ന് അവര്‍ പറഞ്ഞു. തന്റെ ഇപ്പോഴത്തെ നിയമനിര്‍മാണ പദവി ഉപയോഗിച്ച് മാറ്റത്തിനായി ശ്രമിക്കുമെന്നും മക്‌സെല്ലി വ്യക്തമാക്കി.
സൈന്യവുമായി ബന്ധപ്പെട്ട് 2017ല്‍ 6,769 ലൈംഗികാതിക്രമ കേസുകള്‍ രജിസ്റ്റര്‍ ചെയ്തതായി പെന്റഗണ്‍ റിപ്പോര്‍ട്ട് ചെയ്തിരുന്നു. 2016നേക്കാള്‍ 9.7 ശതമാനം വര്‍ധനവാണ് ഇക്കാലയളവില്‍ ഉണ്ടായതെന്നും റിപ്പോര്‍ട്ടില്‍ പറഞ്ഞിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
