ന്യൂയോര്‍ക്ക്: രണ്ടാഴ്ച മുന്‍പ് കാണാതായ ഇന്ത്യന്‍ വംശജയായ 34കാരി ദുരൂഹ സാഹചര്യത്തില്‍ മരിച്ച നിലയില്‍. അമേരിക്കയിലെ ഇല്ലിനോയിസില്‍ താമസിക്കുന്ന സുരേല്‍ ദബാവാലയെയാണ് കാറിന്റെ ഡിക്കിയില്‍ പുതപ്പ് കൊണ്ട് മൂടിയ നിലയില്‍ കണ്ടെത്തിയത്. ചിക്കാഗോ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.
ഡിസംബര്‍ 30നാണ് സുരേല്‍ ദബാവാലയെ കാണാതായത്. ജിമ്മിലേക്ക് എന്ന് പറഞ്ഞ് വീട്ടില്‍ നിന്ന് ഇറങ്ങിയ യുവതി വീട്ടിലേക്ക് തിരിച്ചെത്തിയില്ല എന്ന് വീട്ടുകാരുടെ പരാതിയില്‍ പറയുന്നു. അവസാനം കാര്‍ ഓടിച്ചുപോകുന്നതാണ് കണ്ടതെന്ന് പൊലീസ് പറയുന്നു.
പൊലീസ് അന്വേഷണം നടക്കുന്നതിനിടെ, സ്വകാര്യ അന്വേഷണ ഏജന്‍സികളുടെ സഹായവും യുവതിയുടെ വീട്ടുകാര്‍ തേടിയിരുന്നു. ഇവരാണ് യുവതിയുടെ കാര്‍ കണ്ടെത്തിയത്. ചിക്കാഗോ വെസ്റ്റ് ഗാര്‍ഫീല്‍ഡ് പാര്‍ക്കില്‍ നിന്നാണ് കാര്‍ കണ്ടെത്തിയത്. കാറിന്റെ ഡിക്കി തുറന്നുനോക്കിയ പൊലീസ് പുതപ്പ് കൊണ്ട് മൂടിയ നിലയില്‍ യുവതിയുടെ മൃതദേഹം കണ്ടെത്തുകയായിരുന്നു.
സുരേലിക്ക് എന്താണ് സംഭവിച്ചതെന്ന് അറിയില്ലെന്നാണ് സഹോദരി പറയുന്നത്. മൃതദേഹ പരിശോധന പൂര്‍ത്തിയാവാനുണ്ട്. വിഷാംശ പരിശോധന റിപ്പോര്‍ട്ട് വരാന്‍ ഒരുമാസം എടുക്കും. അതിന് ശേഷം മാത്രമേ അന്വേഷണ പുരോഗതി സംബന്ധിച്ച് എന്തെങ്കിലും അറിയാന്‍ സാധിക്കുകയുളളുവെന്നാണ് റിപ്പോര്‍ട്ടുകള്‍.
ചിക്കാഗോ സര്‍വകലാശാലയില്‍ നിന്ന് എംബിഎ പാസായ സുരേല്‍, അച്ഛന്‍ നടത്തുന്ന മെഡിക്കല്‍ സെന്ററില്‍ ജോലി ചെയ്യുകയായിരുന്നു. അച്ഛന്‍ ഡോക്ടറാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
