റിയാദ്: കൊറോണ വൈറസ് വ്യാപനം ദൈവ ശിക്ഷയാണെന്ന് പ്രചരിപ്പിച്ച മൂന്ന് പേര്ക്കെതിരെ നടപടിയുമായി സൗദി അറേബ്യ. വൈറസ് വ്യാപനത്തെ ദൈവ ശിക്ഷയുമായി ബന്ധിപ്പിച്ച് സാമൂഹിക മാധ്യമങ്ങളിലൂടെ പ്രചാരണങ്ങള് നടത്തിയതിന് മൂവരേയും അറസ്റ്റ് ചെയ്യാൻ പബ്ലിക്ക് പ്രോസിക്യൂട്ടർ ഉത്തരവിട്ടു.
കൊറോണ വ്യാപനത്തെക്കുറിച്ചുള്ള വ്യാജ വിവരങ്ങള് പ്രചരിപ്പിക്കുകയും കൊറോണ കാരണമായുണ്ടായ പ്രതിസന്ധിയെ പരിഹസിക്കുകയും ചെയ്യുന്ന വീഡിയോ ദൃശ്യങ്ങള് സാമൂഹിക മാധ്യമങ്ങള് വഴി പ്രചരിപ്പിച്ച മറ്റൊരാളെയും അറസ്റ്റ് ചെയ്യാന് പ്രോസിക്യൂഷന് ഉത്തരവിട്ടിട്ടുണ്ട്. നാല് പേരെയും അറസ്റ്റ് ചെയ്ത് കേസുകള് കോടതിയ്ക്ക് കൈമാറാനാണ് നിര്ദേശം.
അതേസമയം സൗദിയില് കോവിഡ് 19 വൈറസ് ബാധിച്ച് ഇന്ന് ഒരാള് കൂടി മരിച്ചു. സൗദി പൗരനാണ് മരിച്ചത്. ഇതോടെ സൗദിയില് ഇതുവരെ കോവിഡ് 19 ബാധിച്ച് മരിച്ചവരുടെ എണ്ണം നാലായി. രാജ്യത്ത് 99 പേര്ക്ക് കൂടി ഇന്ന് കോവിഡ് ബാധ സ്ഥിരീകരിച്ചു. ഇതോടെ രാജ്യത്ത് ഇതുവരെ രോഗം സ്ഥിരീകരിച്ചവരുടെ എണ്ണം 1203 ആയി. ചികിത്സയിലായിരുന്ന 37 പേര് രോഗ വിമുക്തി നേടി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ