വാഷിംഗ്ടൺ: സ്വന്തമായി തയ്യാറാക്കിയ മാജിക് മഷ്റൂം ചായ ഞരമ്പിലേക്ക് കുത്തിവച്ച യുവാവിന്റെ ശരീരത്തിൽ കൂണുകൾ പൊട്ടിമുളച്ചു. വിഷാദ രോഗത്തിനുള്ള മരുന്നായാണ് മുപ്പതുകാരനായ യുവാവ് കൂൺ ചായ കുത്തിവച്ചത്. നിരാശ, ഉത്കണ്ഠ തുടങ്ങിയ ബുദ്ധിമുട്ടുകൾക്ക് കൂൺ ഉത്തമ മരുന്നാണെന്ന് ഇന്റർനെറ്റിൽ വായിച്ചറിഞ്ഞതിന് പിന്നാലെയായിരുന്നു യുവാവിന്റെ പ്രവർത്തി.
ഒപിയോയിഡ് ഡിപെൻഡൻസ് ആൻഡ് ഡിപ്രഷൻ എന്ന വിഷാദ അവസ്ഥയായിരുന്നു യുവാവിന്. ബൈപോളാർ ഡിസോഡറുമുള്ള ഇയാൾ ഡോക്ടർമാർ നിർദ്ദേശിച്ച മരുന്ന് കഴിയ്ക്കുന്നത് നിറുത്തിയിരുന്നു. തുടർന്നാണ് ഇന്റർനെറ്റിലൂടെ 200 കൂൺ വർഗങ്ങളെക്കുറിച്ച് മനസിലാക്കിയത്.
കൂണുകൾ വെള്ളത്തിൽ തിളപ്പിച്ചതിന് ശേഷം കോട്ടൺ തുണിയിൽ അരിച്ചെടുത്ത് നേരിട്ട് കൈഞരമ്പിലേക്ക് കുത്തിവച്ചു. ഇതിനുശേഷമാണ് യുവാവിന്റെ ഞരമ്പിനുള്ളിൽ കൂണുകൾ പൊട്ടിമുളച്ചത്. ക്ഷീണം, മഞ്ഞപ്പിത്തം, വയറിളക്കം, ഓക്കാനം തുടങ്ങിയ ബുദ്ധിമുട്ടുകളും യുവാവിനുണ്ടായി. യുവാവിന്റെ കരളും വൃക്കയും തകരാറിലായതായി ഡോക്ടർമാർ കണ്ടെത്തി.
നീണ്ട 22 ദിവസത്തെ ആശുപത്രി വാസത്തിനിടെ യുവാവിന്റെ ആരോഗ്യനില മെച്ചപ്പെട്ടതായാണ് റിപ്പോർട്ട്. ജേണൽ ഒഫ് അക്കാദമി ഓഫ് കൺസൾട്ടേഷൻ ലൈസൻ സൈക്കാട്രിയാണ് ഇത് സംബന്ധിച്ച റിപ്പോർട്ട് പ്രസിദ്ധീകരിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
