സ്മിത്തിന് നേര്‍ക്ക് കൂവിയ ഇന്ത്യന്‍ ആരാധകരോട് കയ്യടിക്കാന്‍ ആവശ്യപ്പെട്ട് ക്രിക്കറ്റ് ലോകത്തിന്റെ പ്രശംസ നേടുകയാണ് ഇന്ത്യന്‍ നായകന്‍. അതിനിടയില്‍ ഇംഗ്ലണ്ട് മുന്‍ താരം നിക് കോംപ്ടന്‍ കോഹ് ലിയുടെ പ്രവര്‍ത്തിയെ വിമര്‍ശിച്ചെത്തിയിരുന്നു. പക്ഷേ, കോഹ് ലിയുടെ ആ നല്ല മനസിനെ വിമര്‍ശിച്ചെത്തിയ ഇംഗ്ലണ്ട് താരത്തെ ആരാധകര്‍ വെറുതെ വിട്ടില്ല.
ഒടുവില്‍ ക്ഷമ ചോദിച്ചിരിക്കുകയാണ് നിക്. സ്മിത്തിന് നേര്‍ക്ക് കൂവിയ ഇന്ത്യന്‍ ആരാധകരോട് കയ്യടിക്കാന്‍ പറയാന്‍ എന്താണ് കോഹ് ലിക്ക് അവകാശം എന്നായിരുന്നു നിക് ചോദിച്ചത്. പണം നല്‍കിയാണ് ആരാധകര്‍ കളി കാണാന്‍ എത്തുന്നത്. ഇഷ്ടമുള്ളത് പോലെ പ്രതികരിക്കാനുള്ള അവകാശം അവര്‍ക്കുണ്ടെന്നും നിക് അഭിപ്രായപ്പെട്ടിരുന്നു.
നിക്കിന്റെ പ്രതികരണം വന്നതിന് പിന്നാലെ ഇന്ത്യന്‍ ആരാധകര്‍ പൊങ്കാലയും ആരംഭിച്ചിരുന്നു. അതോടെ, കോഹ് ലിക്കെതിരായ തന്റെ പ്രതികരണം ആരെയെങ്കിലും വേദനിപ്പിച്ചിട്ടുണ്ട് എങ്കില്‍ മാപ്പ് ചോദിക്കുന്നു എന്ന് വ്യക്തമാക്കി നിക്ക് വീണ്ടും ട്വിറ്ററിലെത്തി. നല്ല ഉദ്ദേശത്തോടെയാണ് കോഹ് ലിയുടെ ഭാഗത്ത് നിന്ന് അങ്ങനെയൊരു നീക്കമുണ്ടായത് എന്നും നിക് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
