ഏകദിന ക്രിക്കറ്റില് ഏറ്റവും വേഗത്തില് 11,000 റണ്സ് തികയ്ക്കുന്ന താരമെന്ന റെക്കോര്ഡാണ് പാകിസ്ഥാനെതിരായ ഇന്നിങ്സിലൂടെ കോഹ് ലി സ്വന്തമാക്കിയത്. ഈ സമയം കമന്ററി ബോക്സിലുണ്ടായിരുന്നത് ഇന്ത്യന് മുന് നായകന് സൗരവ് ഗാംഗുലി. കോഹ് ലിയെ വാനോളം പ്രശംസിക്കുമ്പോഴും, ഇതേ ലിസ്റ്റിലുള്ള തന്റെ പേര് ഒഴിവാക്കിയായിരുന്നു ഗാംഗുലിയുടെ സംസാരം. ദാദയുടെ ഈ നീക്കത്തെ പ്രശംസ കൊണ്ട് മൂടുകയാണ് ആരാധകരിപ്പോള്.
പാകിസ്ഥാനെതിരെ ഹസന് അലിയുടെ ഡെലിവറിയില് ഫൈന് ലെഗിലൂടെ ബൗണ്ടറി നേടി സ്കോര് 60ല് എത്തിച്ചാണ് കോഹ് ലി 11000 റണ്സ് ക്ലബിലേക്ക് എത്തിയത്. ഈ നേട്ടം കൈവരിക്കാന് സച്ചിനെടുത്തത് 286 ഇന്നിങ്സ്. ഗാംഗുലിയെടുത്തത് 288 ഇന്നിങ്സ്. എന്നാല് കോഹ് ലിക്ക് വേണ്ടിവന്നത് 222 ഇന്നിങ്സ് മാത്രം.
കോഹ് ലിയുടെ നേട്ടത്തെ കുറിച്ച് വാചാലനാവുന്നതിന് ഇടയില് ഈ നേട്ടം കൈവരിച്ച സച്ചിന്റേയുംം, പോണ്ടിങ്ങിന്റേയും പേര് ഗാംഗുലി പറഞ്ഞു. എന്നാല് സ്വന്തം പേര് പറയാന് ഗാംഗുലി തയ്യാറായില്ല. ഗാംഗുലിയുടെ ഈ സമീപനത്തെ പുകഴ്ത്തുകയാണ് സമൂഹമാധ്യമങ്ങളില് ആരാധകര്. 11000 റണ്സ് ക്ലബിലേക്കെത്തുന്ന മൂന്നാമത്തെ ഇന്ത്യക്കാരനാണ് കോഹ് ലി. സച്ചിനും ഗാംഗുലിയും മാത്രമാണ് ഏകദിനത്തില് 11000 റണ്സ് പിന്നിട്ടത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ