ഒന്നിനും മൂഡ് ഇല്ല!, സന്തോഷം കൂട്ടാനും ഭക്ഷണമുണ്ട്; സെറോടോണിൻ തരുന്ന അഞ്ച് സൂപ്പർഫുഡുകൾ 

ജോലിയുടെ സമ്മർദ്ദവും വീട്ടിലെ കാര്യങ്ങൾ ഓർത്തുള്ള ടെൻഷനുമൊക്കെ നമ്മുടെ സന്തോഷത്തെ കുറച്ചൊന്നുമല്ല സ്വാധീനിക്കുന്നത്. ഇങ്ങനെ വരുമ്പോഴാണ് ഇമോഷണൽ ഈറ്റിങ്ങിനെ പലരും ആശ്രയിക്കുന്നത്. ചിലർ ഐസ്‌ക്രീം പാട്ട അപ്പാടെ കാലിയാക്കുന്നത് കണ്ടിട്ടില്ലേ? ഭൂരിഭാഗം ആളുകളും ഇത്തരം സന്ദർഭങ്ങളെയൊക്കെ ദിവസേനയെന്നോണം നേരിടേണ്ടിവരാറുണ്ട്. എന്നാൽ ആരോഗ്യകരമായ ജീവിതരീതിയും സെറോടോണിൻ അടങ്ങിയ ഭക്ഷണക്രമവും നമ്മുടെ മൂഡ് മെച്ചപ്പെടുത്താൻ സഹായിക്കും. 

എന്താണ് സെറോടോണിൻ?
 
തലച്ചോറിലും ശരീരത്തിന്റെ മറ്റ് ഭാഗങ്ങളിലും സ്വാഭാവികമായി ഉത്പാദിപ്പിക്കപ്പെടുന്ന രാസ ന്യൂറോട്രോൻസ്മിറ്ററാണ് സെറോടോണിൻ. സെറോടോണിൻറെ അളവ് കൂടുമ്പോൾ സ്വാഭാവികമായും നമുക്ക് സന്തോഷം തോന്നും. മാനസികാവസ്ഥ മെച്ചപ്പെടാൻ ഇത് സഹായിക്കുമെന്നത് തന്നെയാണ് കാരണം. അതേസമയം സെറോടോണിൻ കുറയുമ്പോൾ വിഷാദവും ഉത്കണ്ഠയുമൊക്കെ സ്ഥാനംപിടിക്കും. ഇത് ഉറക്കമില്ലായ്മ, അനാവശ്യ ചിന്തകൾ, നെ​ഗറ്റീവ് ചിന്തകൾ എന്നിങ്ങനെ പല ബുദ്ധിമുട്ടുകൾക്കും കാരണമാകും. 

ജനിതക ഘടകങ്ങൾ മുതൽ പാരിസ്ഥിതിക ഘടകങ്ങളും ഭക്ഷണവും മരുന്നുകളും ജീവിതരീതിയുമൊക്കെ സെറാടോണിൻ കുറയാൻ കാരണമാകും. അതുകൊണ്ടുതന്നെ സെറാടോണിൻ കൂടാൻ സഹായിക്കുന്ന ഭക്ഷണം തെരഞ്ഞെടുക്കേണ്ടത് അനിവാര്യമാണ്. ഇത് നിങ്ങൾക്ക് മാനസികാവസ്ഥയിലും ആരോഗ്യത്തിലും നല്ല സ്വാധീനം ചെലുത്തും.

സെറാടോണിൽ കൂട്ടാൻ സഹായിക്കുന്ന 5 സൂപ്പർഫുഡുകൾ

പഴം - പഴത്തിൽ ട്രിപ്റ്റോഫാൻ എന്ന അമിനോ ആസിഡ് അടങ്ങിയിട്ടുണ്ട്. സെറോടോണിൻ, മെലറ്റോണിൻ എന്നിവ ഉണ്ടാക്കുന്ന 5-എച്ച്ടിപി എന്ന സംയുക്തം ഉത്പാദിപ്പിക്കാൻ ശരീരത്തിന് ട്രിപ്റ്റോഫാൻ ആവശ്യമാണ്. 

ബദാം - ഫോളേറ്റ്, മഗ്നീഷ്യം എന്നിവയുൾപ്പെടെ ധാരാളം പോഷകങ്ങളുടെ കലവറയാണ് ബദാം. സെറോടോണിൻ ഉത്പാദനത്തിൽ പ്രധാന പങ്ക് വഹിക്കുന്ന മ​ഗ്നീഷ്യം തലച്ചോറിൽ സന്തോഷത്തിന്റെ വികാരങ്ങൾ നിറയ്ക്കാൻ സഹായിക്കുന്നതുമാണ്. ബദാമിൽ വിറ്റാമിൻ ബി 2, വിറ്റാമിൻ ഇ എന്നിവയും ധാരാളമുണ്ട്. ഇത് സമ്മർദ്ദത്തെ പ്രതിരോധിക്കാൻ സഹായിക്കും. 

പശുവിൻപാൽ - പാലിലും സെറോടോണിൻ ഉത്പാദിപ്പിക്കുന്ന അമിനോ ആസിഡായ ട്രിപ്റ്റോഫാൻ അടങ്ങിയിട്ടുണ്ട്. ഉറക്കവും മാനസികാവസ്ഥയും നിയന്ത്രിക്കുന്നതിൽ ഇത് പ്രധാനപങ്ക് വഹിക്കും. കാൽ‌ഷ്യം, വിറ്റാമിൻ ബി12 എന്നിവയാൽ സമ്പന്നമായ പാൽ സെറോടോണിൻ വർദ്ധിപ്പിക്കും. 

പൈനാപ്പിൾ - തലച്ചോറിലെ സെറോടോണിൻ വർദ്ധിപ്പിക്കാൻ സഹായിക്കുന്ന ട്രിപ്റ്റോഫാൻ പൈനാപ്പിളിലും അടങ്ങിയിട്ടുണ്ട്. ഇതിനുപുറമേ പൈനാപ്പിളിൽ അടങ്ങിയ ബ്രോമെലൈൻ എന്ന പ്രോട്ടീൻ ധാരാളം ആന്റി-ഇൻഫ്ളമേറ്ററി ​ഗുണങ്ങൾ അടങ്ങിയതാണ്. 

സോയ - ട്രിപ്റ്റോഫാൻറെ സമ്പന്നമായ ഉറവിടമാണ് സോയ ഉൽപ്പന്നങ്ങൾ. സസ്യാഹാരികൾക്കും വീ​ഗൻ ഭക്ഷണക്രമം പാലിക്കുന്നവർക്കും പോഷകങ്ങളുടെ ഏറ്റവും നല്ല ശ്രോതസ്സാണ് സോയ ഉൽപ്പന്നങ്ങൾ. 

ഈ വാര്‍ത്ത കൂടി വായിക്കൂ

'ഏത് നേരവും ആ കുന്തം ചെവിയിൽ വച്ച് ഇരിക്കും, വിളിച്ചാലും കേൾക്കില്ല'; ഇയർഫോൺ ഉപയോ​ഗം കേൾവിശക്തി നശിപ്പിക്കുമോ?   

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ‌