കരിക്കും സംഭാരവുമൊക്കെ വിലസി നടന്ന നമ്മുടെ നാട്ടിലേക്ക് ചില്ലുകുപ്പിയില് പ്ലാസ്റ്റിക് മുണ്ടുടുത്ത് കോക്ക് വന്നിട്ട് അധികമായിട്ടില്ല. എന്നാല് ജന്മജന്മാന്തരങ്ങളായുള്ള ബന്ധം എന്ന നിലയിലാണ് പുതുതലമുറ കോക്കിനെ ആരാധിക്കുന്നത്. അഞ്ച് മിനിറ്റിനുള്ളില് കുടിച്ചു തീര്ക്കുന്ന ഒരു കുപ്പി കോക്ക് നിങ്ങളുടെ ആയുസിന്റെ ഏതാണ്ട് 12 മിനിറ്റ് വെട്ടിച്ചുരുക്കുന്നുവെന്നാണ് പുതിയ പഠനത്തില് സൂചിപ്പിക്കുന്നത്.
കോക്ക് മാത്രമല്ല, ആരോഗ്യകരമെന്ന് പറയപ്പെടുന്ന മുട്ടയും ബ്രേക്ക്ഫാസ്റ്റ് സാന്ഡ് വിച്ചുമൊക്കെ പട്ടികയിലുണ്ട്. അള്ട്രാ പ്രോസസ്ഡ് ഭക്ഷണ വിഭാഗത്തില് വരുന്ന മിക്ക ഭക്ഷണങ്ങളും നമ്മുടെ ആയുസ് വെട്ടിച്ചുരുക്കുന്നുണ്ടെന്ന് മിഷിഗണ് സര്വകലാശാല നടത്തിയ പഠനത്തില് വ്യക്തമാക്കുന്നു. കോക്ക് പോലുള്ള പാനീയങ്ങള് 12 മിനിറ്റ് കവര്ന്നെടുക്കുമ്പോള് ഹോട്ട്ഡോഗ് ആരാധകരുടെ ആയുസ് ഓരോ തവണയും 36 മിനിറ്റ് വീതമാണ് കുറയുന്നത്.
മുട്ടയും ബ്രേക്ക്ഫാസ്റ്റ് സാന്ഡ് വിച്ചും കഴിക്കുന്നതു കൊണ്ട് 13 മിനിറ്റ് വീതമാണ് ആയുസു കുറയുന്നതെന്നും പഠനത്തില് ചൂണ്ടിക്കാണിക്കുന്നു.
ആളുകളുടെ ഇഷ്ടഭക്ഷണങ്ങളായ പിസ്സ, മക്രോണി, ഹോട്ട്ഡോഗ്, കോക്ക് തുടങ്ങിയവ ആയുര്ദൈര്ഘ്യം കുറയ്ക്കുന്നതായി കണ്ടെത്തിയെങ്കിലും ചിലതരം മത്സ്യങ്ങള് പോലുള്ള ആരോഗ്യകരമായ തെരഞ്ഞെടുപ്പുകള് ആയുസ് വര്ധിപ്പിക്കുമെന്നും പഠനം വെളിപ്പെടുത്തുന്നു.
കൂടാതെ അള്ട്രാ പ്രോസസ്ഡ് ഭക്ഷണങ്ങള് ഹൃദ്രോഗ സാധ്യത 50 ശതമാനമായി വര്ധിപ്പിക്കുമെന്ന് അടുത്തിടെ ബ്രിട്ടീഷ് മെഡിക്കല് ജേണല് പ്രസിദ്ധീകരിച്ച പഠനത്തില് ചൂണ്ടിക്കാട്ടിയിരുന്നു. ഉത്കണ്ഠ പോലുള്ള മാനസികപ്രശ്നങ്ങള്ക്കുള്ള സാധ്യത അള്ട്രാ പ്രോസസ്ഡ് ഭക്ഷണങ്ങള് കഴിക്കുന്നതു കൊണ്ട് 48 മുതല് 53 ശതമാനം വരെ വര്ധിപ്പിക്കാം. കൂടാതെ ടൈപ്പ് 2 പ്രമേഹത്തിനുള്ള സാധ്യത 12 ശതമാനം കൂടുതലാണെന്നും പഠനത്തില് ചൂണ്ടിക്കാണിക്കുന്നു.
ഉറക്ക പ്രശ്നങ്ങൾ, വിഷാദം, ആസ്ത്മ, ഉയർന്ന കൊളസ്ട്രോൾ, ദഹനനാളത്തിന്റെ പ്രശ്നങ്ങൾ എന്നിവയാണ് അള്ട്രാ പ്രോസസ്ഡ് ഭക്ഷണളുമായി ബന്ധപ്പെട്ട മറ്റ് ആരോഗ്യപ്രശ്നങ്ങളെന്ന് ഗവേഷകര് ചൂണ്ടിക്കാണിക്കുന്നു. മിതമായ അളവിൽ അള്ട്രാ പ്രോസസ്ഡ് ഭക്ഷണങ്ങള് കഴിക്കാമെങ്കിലും ദീര്ഘകാല ആരോഗ്യത്തിന് അൾട്രാ-പ്രോസസ് ചെയ്ത ഭക്ഷണങ്ങൾ ഒഴിവാക്കുന്നതാണ് മികച്ചതെന്നും ഗവേഷകര് പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
