പ്രോസ്റ്റേറ്റ് കാൻസർ; 50 വയസിന് മുകളിലുള്ള പുരുഷന്മാർ ഒഴിവാക്കേണ്ട 5 ഭക്ഷണങ്ങൾ

യുഎസ് മുൻ പ്രസിഡന്റ് ജോ ബൈഡന് പ്രോസ്റ്റേറ്റ് കാൻസർ (Prostate Cancer) സ്ഥിരീകരിച്ചതായി കഴിഞ്ഞ ദിവസം അദ്ദേഹത്തിന്റെ ഓഫീസ് പുറത്തുവിട്ടിരുന്നു. മൂത്രസംബന്ധ രോ​ഗങ്ങളുമായി ബന്ധപ്പെട്ട് നടത്തിയ പരിശോധനയിലാണ് രോ​ഗാവസ്ഥ കണ്ടെത്തുന്നത്. അർബുദം വളരെ വഷളായ അവസ്ഥയിലാണെന്നാണ് റിപ്പോർട്ടുകൾ. പുരുഷന്മാരിൽ സ്കിൻ കാൻസർ കഴിഞ്ഞാൽ ഏറ്റവും സാധാരണമായി കാണുന്ന രണ്ടാമത്തെ അർബുദമാണ് പ്രോസ്റ്റേറ്റ് കാന്‍സർ.

പുരുഷന്മാരില്‍ മലാശയത്തിനും മൂത്ര സഞ്ചിക്കും ഇടക്ക് കാണുന്ന പ്രോസ്റ്റേറ്റ് ഗ്രന്ഥിയെ ബാധിക്കുന്ന അർബുദമാണ് പ്രോസ്റ്റേറ്റ് കാൻസർ. സാധാരണ 60 കഴിഞ്ഞ പുരുഷന്മാരിലാണ് പ്രോസ്റ്റേറ്റ് കാൻസർ ഉണ്ടാവുക. എന്നാൽ 50 കഴി‍ഞ്ഞവരിലും പ്രോസ്റ്റേറ്റ് കാൻസർ കണ്ടുവരുന്നുണ്ടെന്ന് സമീപകാല പഠനങ്ങൾ തെളിയിക്കുന്നു. ജനിതകം, പ്രായം, ജീവിതശൈലി എന്നിവ അർബുദ സാധ്യത വർധിപ്പിക്കുന്നതിൽ പ്രധാന പങ്ക് വഹിക്കുന്നുണ്ടെങ്കിലും ഭക്ഷണക്രമം പ്രോസ്റ്റേറ്റ് ആരോ​ഗ്യത്തിൽ ഒരു നിർണായക ഘടകമാണ്.

ചില ഭക്ഷണങ്ങൾ പ്രോസ്റ്റേറ്റ് കാൻസർ വരാനുള്ള സാധ്യത വർധിപ്പിക്കും. 50 വയസ്സിനു മുകളിലുള്ള പുരുഷന്മാർ പ്രോസ്റ്റേറ്റ് കാൻസർ സാധ്യത കുറയ്ക്കുന്നതിന് ഒഴിവാക്കേണ്ട 5 ഭക്ഷണങ്ങൾ

ബീഫ്, പന്നിയിറച്ചി പോലുള്ളവ ഉപയോ​ഗിച്ചുണ്ടാക്കുന്ന വിഭവങ്ങൾ, പ്രത്യേകിച്ച് ഉയർന്ന താപനിലയിൽ പാകം ചെയ്യുന്നത് പ്രോസ്റ്റേറ്റ് കാൻസറിനുള്ള സാധ്യത വർധിപ്പിക്കുന്നുണ്ടെന്ന് ​ഗവേഷകർ പറയുന്നു. ഉയർന്ന താപനിലയിൽ മാംസം ചൂടാക്കുന്നത് അതിൽ നിന്ന് ഹെറ്ററോസൈക്ലിക് അമൈൻസ് എന്ന ദോഷകരമായ രാസവസ്തുക്കൾ പുറപ്പെടുവിക്കാൻ കാരണമാകുന്നു. ഇത് കോശങ്ങളെ നശിപ്പിക്കുന്നതിനും കാൻസറിന് കാരണമാവുകയും ചെയ്യുന്നു. റെഡ് മീറ്റ് കഴിക്കുന്നവർ അതിന്റെ അളവു പരിമിതപ്പെടുത്തുന്നത് കാൻസർ വരാനുള്ള സാധ്യത കുറയ്ക്കുന്നു.

കൊഴുപ്പ് അധികമായി അടങ്ങിയ പാൽ, ചീസ്, വെണ്ണ, ക്രീം, തൈര് തുടങ്ങിയ പാലുൽപ്പന്നങ്ങളിൽ പ്രോസ്റ്റേറ്റ് കാൻസർ സാധ്യത വർദ്ധിപ്പിക്കുന്ന പൂരിത കൊഴുപ്പുകളും ഹോർമോണുകളും അടങ്ങിയിട്ടുണ്ട്. കൊഴുപ്പ് കൂടുതലുള്ളതിന് പകരം കൊഴുപ്പ് കുറഞ്ഞതോ കൊഴുപ്പ് രഹിതമോ ആയ ഉൽപ്പന്നങ്ങൾ തിരഞ്ഞെടുക്കാവുന്നതാണ്. ബദാം മിൽക്, സോയ മിൽക് പോലുള്ള ഉൽപന്നങ്ങൾ പരീക്ഷിക്കാവുന്നതാണ്.

പായ്ക്കറ്റുകളിൽ വാങ്ങുന്ന മാംസം, വെണ്ണ, ചീസ്, പായ്ക്ക് ചെയ്ത ലഘുഭക്ഷണങ്ങൾ, വറുത്ത ഭക്ഷണങ്ങൾ എന്നിവയിൽ ട്രാൻസ് ഫാറ്റുകൾ ഉണ്ടാകാറുണ്ട്. ഈ അനാരോഗ്യകരമായ കൊഴുപ്പുകൾ ശരീര വീക്കം വർധിപ്പിക്കുകയും പ്രോസ്റ്റേറ്റ് കാൻസർ കോശങ്ങളുടെ വളർച്ചയെ പ്രോത്സാഹിപ്പിക്കുകയും ചെയ്യുന്നു. പൂരിത കൊഴുപ്പുകളും ട്രാൻസ് ഫാറ്റുകൾക്കും പകരം ഒലിവ് ഓയിൽ, അവോക്കാഡോ, നട്സ്, വിത്തുകൾ, ഒമേഗ-3 ഫാറ്റി ആസിഡുകൾ അടങ്ങിയ ഫാറ്റി ഫിഷ് തുടങ്ങിയ ആരോഗ്യകരമായ കൊഴുപ്പുകൾ ഉപയോ​ഗിക്കാവുന്നതാണ്. എല്ലാത്തരം സംസ്കരിച്ചതും ജങ്ക് ഫുഡും ഒഴിവാക്കുക.

പഞ്ചസാരയിൽ ചെറിയ അളവിൽ പോലും പോഷക​ഗുണം ഉണ്ടായിരിക്കില്ല. അമിതമായി പഞ്ചസാര കഴിക്കുന്നത് അമിതവണ്ണത്തിലേക്കും പ്രോസ്റ്റേറ്റ് കാൻസർ പോലെ ആരോ​ഗ്യ സങ്കീർണതകളിലേക്കും നയിക്കാം. പഞ്ചസാര സോഡകൾ, ജ്യൂസുകൾ, മിഠായികൾ, പേസ്ട്രികൾ, മിഠായികൾ, മറ്റ് മധുരപലഹാരങ്ങൾ എന്നിവ രക്തത്തിലെ പഞ്ചസാരയുടെ വർധനവിനും ശരീരഭാരം വർധിപ്പിക്കുന്നതിനും കാരണമാകുന്നു. ശരീരത്തിലെ അധിക കൊഴുപ്പ് ശരീര വീക്കം വർധിപ്പിക്കുകയും കാൻസർ വളർച്ചയെ പ്രോത്സാഹിപ്പിക്കുന്ന ഹോർമോൺ അസന്തുലിതാവസ്ഥ വർധിപ്പിക്കുകയും ചെയ്യുന്നു. പഞ്ചസാര പാനീയങ്ങളും മധുരപലഹാരങ്ങളും കഴിയുന്നത്ര പരിമിതപ്പെടുത്തുക. ജ്യൂസുകൾക്കോ ​​പഞ്ചസാര അടങ്ങിയ ലഘുഭക്ഷണങ്ങൾക്കോ ​​പകരം പഴങ്ങളായി തന്നെ തിരഞ്ഞെടുക്കുക. രക്തത്തിലെ പഞ്ചസാര സ്ഥിരമായി നിലനിർത്താൻ ധാന്യങ്ങളിലും നാരുകൾ അടങ്ങിയ ഭക്ഷണങ്ങളും കഴിക്കുന‌ക.

അമിതമായി മദ്യപിക്കുന്നത് രോഗപ്രതിരോധ ശേഷിയെ ദുർബലപ്പെടുത്തുകയും പ്രോസ്റ്റേറ്റ് കാൻസർ ഉൾപ്പെടെയുള്ള നിരവധി അർബുദ സാധ്യത വർധിപ്പിക്കുകയും ചെയ്യുന്നു. മദ്യം ഹോർമോൺ അളവിനെ ബാധിക്കുകയും ശരീര വീക്കം ഉണ്ടാക്കുകയും ചെയ്യുന്നു. ഇത് പ്രോസ്റ്റേറ്റ് ആരോഗ്യത്തെ ദോഷകരമായി ബാധിക്കും. മദ്യപാനം പരിമിതപ്പെടുത്തുകയോ ഒഴിവാക്കുകയോ ചെയ്യുന്നതാണ് നല്ലത്.