നവംബര്‍ 17ന് വൃശ്ചികമാസം തുടങ്ങും. ഇത് ശബരിമല മണ്ഡലക്കാലാരംഭം കൂടിയാണ്. നവംബര്‍ 19ന് രാത്രി 8:56 മുതല്‍ അനിഴം ഞാറ്റുവേലയാണ്. നവംബര്‍ 21ന് ഹേമന്ത ഋതു ആരംഭിയ്ക്കും. ഇത് മാര്‍ഗ്ഗ ശീര്‍ഷമാസാരംഭ ദിനം കൂടിയാണ്. നവംബര്‍ 23 മുതല്‍ കടലില്‍ ന്യൂനമര്‍ദ്ദ സാധ്യത പറയാവുന്ന ഗ്രഹ ഘടന കാണുന്നുണ്ട്.
അശ്വതി, ഭരണി, കാര്‍ത്തിക 1-ാം പാദം
ഈ നക്ഷത്രങ്ങളില്‍ ജനിച്ചവര്‍ക്ക് പൊതുവെ ഇക്കാലം നല്ല സമയമാണ്. വിവാഹാദി മംഗളകര്‍മ്മങ്ങള്‍ക്ക് ശ്രമിക്കുന്നവര്‍ക്ക് അതിന് സാധ്യതയുള്ള കാലം കൂടിയാണ്. ക്രയവിക്രയങ്ങളില്‍ ഗുണാനുഭവങ്ങള്‍, ഭവന നിര്‍മ്മാണം, വാഹന ലാഭം, കൃഷിയില്‍ ഗുണങ്ങള്‍, അധികാര പ്രാപ്തി, ഉദ്ദിഷ്ട കാര്യസിദ്ധി എന്നിവയ്ക്കെല്ലാം യോഗമുണ്ട്.
കാര്‍ത്തിക 2, 3, 4 പാദങ്ങള്‍, രോഹിണി, മകയിരം 1, 2 പാദങ്ങള്‍
ഈ നക്ഷത്രക്കാര്‍ക്ക് ഗുണദോഷ സമ്മിശ്രമായ സമയമാണ്. സുഹൃജ്ജനങ്ങളുമായി സഹവാസം, ദേശ പുരോഗതിയ്ക്കായുള്ള പ്രവര്‍ത്തനങ്ങള്‍, സഹോദരഗുണം, വിദ്യാഗുണം, ധനലാഭം, ഭൂമി ലാഭം എന്നിവയ്ക്കെല്ലാം യോഗമുണ്ട്. അവിചാരിതമായ യാത്രയ്ക്കും യോഗമുണ്ട്.
മകീരം 3, 4 പാദങ്ങള്‍, തിരുവാതിര, പുണര്‍തം 1, 2, 3 പാദങ്ങള്‍
ഈ നക്ഷത്രത്തില്‍ ജനിച്ചവര്‍ക്ക് ഈ കാലം നല്ലതാണ്. വിദ്യകൊണ്ട് ഗുണാനുഭവങ്ങള്‍, വേദാന്താദി ശാസ്ത്രങ്ങളില്‍ ആഭിമുഖ്യം, ഉദ്ദിഷ്ട കാര്യസിദ്ധി, ഗവേഷപഠനങ്ങളിലേര്‍പ്പെട്ടവര്‍ക്ക് ഗുണാനുഭവങ്ങള്‍, സമ്പദ് സമൃദ്ധി, എന്നിവയ്ക്കെല്ലാം യോഗമുണ്ട്.
പുണര്‍തം 4 -ാം പാദം, പൂയം, ആയില്യം
ഈ നക്ഷത്രക്കാര്‍ക്ക് ഈ സമയം ഈശ്വരാധീനമുള്ള സമയമാണ്. സന്യാസി ശ്രേഷ്ഠരുമായി സംസര്‍ഗ്ഗം,സാഹിത്യ സാംസ്‌ക്കാരിക രംഗത്ത് ഗുണാനുഭവം, വിദ്യാര്‍ഥികള്‍ക്കും ഗവേഷകര്‍ക്കും ധാരാളം ഗുണാനുഭവങ്ങള്‍ എന്നിവയ്ക്ക് യോഗമുണ്ട്. ഇവരുടെ വിവാഹാദി കാര്യങ്ങള്‍ക്കും സന്താന ഗുണത്തിനും കൂടി യോഗമുള്ള സമയമാണ്.
മകം, പൂരം, ഉത്രം 1-ാം പാദം
വിചാരിച്ച കാര്യങ്ങള്‍ക്കെല്ലാം തടസ്സങ്ങള്‍ക്ക് സാധ്യതയുണ്ടെങ്കിലും ഉണര്‍ന്ന് പ്രവര്‍ത്തിച്ചാല്‍ വിജയിക്കുന്നതാണ്. അലസത, ശരീരത്തില്‍ മുറിവുകള്‍, തീപ്പൊള്ളലേല്‍ക്കാനിടവരിക, നാല്‍ക്കാലികളില്‍ നിന്ന് ഉപദ്രവം എന്നിവയ്ക്കും യോഗമുണ്ട്. അനാവശ്യ കാര്യങ്ങളില്‍ ഇടപെടാതിരിയ്ക്കാന്‍ പ്രത്യേകം ശ്രദ്ധിയ്ക്കണം.
ഉത്രം 2, 3, 4 പാദങ്ങള്‍, അത്തം, ചിത്തിര 1, 2, പാദങ്ങള്‍
ഈ നക്ഷത്രക്കാര്‍ക്ക് ഇക്കാലത്ത് കണ്ടകശ്ശനിദോഷമുണ്ടെങ്കിലും ഗുണഫലങ്ങള്‍ക്ക് സാധ്യതയേറെയുണ്ട്. ഉദ്ദിഷ്ടകാര്യസിദ്ധി, ധനലാഭം, ഭൂമീലാഭം, ഐശ്വര്യം, പ്രതാപം, നാല്‍ക്കാലി വര്‍ദ്ധനം, ക്രയവിക്രയങ്ങളില്‍ ലാഭം എന്നിവയ്ക്കും യോഗം കാണുന്നുണ്ട്. കലാ സാഹിത്യ രംഗത്തുള്ളവര്‍ക്കും ഗൃഹാരംഭത്തിന് ശ്രമിക്കുന്നവര്‍ക്കും നല്ല സമയമാണ്. വിദ്യാര്‍ഥികള്‍ക്കും ഗവേഷകര്‍ക്കും ഇക്കാലം വളരെ നല്ല സമയമാണ്.
ചിത്തിര 3, 4 പാദങ്ങള്‍, ചോതി, വിശാഖം 1, 2, 3 നക്ഷത്രപാദങ്ങള്‍
ഇവര്‍ക്ക് ഈ സമയം വളരെ നല്ലതാണ്. പരിശ്രമങ്ങള്‍ക്ക് വേണ്ട ഫലം ലഭിക്കുന്ന കാലമാണ്. സൗഭാഗ്യം, ഉന്നതാധികാര പ്രാപ്തി, ധനാഗമനം, വിദ്യാഗുണം, വിവാഹം, വിദേശവാസ യോഗം എന്നിവയ്ക്ക് യോഗമുള്ള സമയമാണ്.
വിശാഖം 4-ാം പാദം, അനിഴം, തൃക്കേട്ട
ഈ നക്ഷത്രക്കാര്‍ക്ക് ഇക്കാലം നല്ല സമയമാണ്. വിദ്യാഗുണം, കുടുംബ സുഖം, സ്ഥാനമാനങ്ങള്‍ എന്നിവയ്ക്കും യോഗമുണ്ട്. അലസത മാറ്റി പ്രവര്‍ത്തിച്ചാല്‍ ധാരാളം ഗുണഫലങ്ങള്‍ അനുഭവപ്പെടാന്‍ യോഗമുണ്ട്.
മൂലം, പൂരാടം, ഉത്രാടം 1-ാം പാദം
അല്പം ഈശ്വരാധീനക്കുറവ് അനുഭവപ്പെടുന്ന സമയമാണിത്. അതിയായ അലസത , അനാവശ്യ ചെലവുകള്‍, അപവാദങ്ങള്‍, കണ്ടകശ്ശനി കാരണം ഗുണാനുഭവങ്ങള്‍ക്ക് കാലതാമസം എന്നിവയ്ക്കെല്ലാം സാധ്യതയുണ്ട്. അനാവശ്യ കാര്യങ്ങളില്‍ ഇടപെടുന്നത് ഒഴിവാക്കണം. സംഗീത സാഹിത്യ കലാ സിനിമ മുതലായ മേഖലകളില്‍ പ്രവര്‍ത്തിക്കുന്നവര്‍ക്ക് ശോഭിക്കാന്‍ പറ്റിയ സമയമാണ്. ആത്മാര്‍ത്ഥമായി പ്രവര്‍ത്തിച്ചാല്‍ വന്‍ മാറ്റങ്ങള്‍ക്ക് സാധ്യതയുണ്ട്.
ഉത്രാടം 2, 3, 4 പാദങ്ങള്‍, തിരുവോണം, അവിട്ടം 1, 2 പാദങ്ങള്‍
ഈ നക്ഷത്രക്കാര്‍ക്ക് പ്രായേണ ഗുണാനുഭവങ്ങള്‍ക്ക് സാധ്യതയുള്ള സമയമാണ്. ഏറ്റെടുക്കുന്ന പ്രവൃത്തികള്‍ക്കെല്ലാം പൂര്‍ണ്ണത വരുന്ന സമയമാണ്. കൃഷിയില്‍ ലാഭം, സമൂഹത്തില്‍ മാന്യത, ധര്‍മ്മാഷ്ഠാനതല്പരത, ക്രയവിക്രയങ്ങളില്‍ ലാഭം, സഹായികളുടെ വര്‍ദ്ധന, സുഖസമൃദ്ധമായ ജീവിതം എന്നിവയ്ക്കെല്ലാം യോഗമുണ്ട്. എന്നിരുന്നാലും വീഴ്ച, ചതിയേല്‍ക്കാനിട വരിക, ശരീരത്തില്‍ മുറിവേല്‍ക്കാനിട വരിക, അവിചാരിതമായ നാശനഷ്ടങ്ങള്‍ എന്നിവയ്ക്കും യോഗമുള്ളതിനാല്‍ ശ്രദ്ധിച്ച് പ്രവര്‍ത്തിക്കേണ്ട സമയം കൂടിയാണ്.
അവിട്ടം 3, 4 പാദങ്ങള്‍, ചതയം, പൂരോരുട്ടാതി 1, 2, 3 പാദങ്ങള്‍
ഈ നക്ഷത്രക്കാര്‍ക്ക് അല്പം ഈശ്വരാധീനക്കുറവ് പറയാവുന്ന സമയമാണ്. ഏര്‍പ്പെടുന്ന കാര്യങ്ങള്‍ക്കെല്ലാം പല തരം തടസ്സങ്ങള്‍ അനുഭവപ്പെടാന്‍ സാധ്യത ഉണ്ട്. കലാ സാഹിത്യാദി രംഗത്ത് പ്രവര്‍ത്തിക്കുന്നവര്‍ക്ക് പ്രശസ്തിയ്ക്ക് സാധ്യത ഉണ്ട്. സന്താനങ്ങള്‍ക്ക് ഉയര്‍ച്ചയ്ക്ക് സാധ്യത ഉണ്ട്.
പൂരോരുട്ടാതി 4-ാം പാദം, ഉത്രട്ടാതി, രേവതി
ഇവര്‍ക്ക് ഇക്കാലം നല്ല സമയമാണ്. മന:സന്തോഷം, അധികാരലബ്ധി, കുടുംബത്തില്‍ വിവാഹാദി മംഗളകര്‍മ്മങ്ങള്‍ക്ക് നേതൃത്വം കൊടുക്കാനിടവരുക, കാര്യജയം, പ്രശസ്തി എന്നിവയ്ക്കും യോഗമുണ്ട്. അലസത മാറ്റി വേണ്ട വിധം പ്രവര്‍ത്തിച്ചാല്‍ വന്‍ മാറ്റങ്ങള്‍ക്ക് യോഗമുള്ള സമയമാണ്. അനാവശ്യ ചെലവുകള്‍, ഉദരരോഗ, പാദരോഗ സാധ്യതകള്‍, അലര്‍ജി മൂലം അസുഖങ്ങള്‍ എന്നിവയ്ക്കും യോഗമുള്ളതിനാല്‍ ശ്രദ്ധിക്കേണ്ടതാണ്
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates