ന്യൂഡല്‍ഹി: മെസേജിങ് ആപ്ലിക്കേഷനുകളായ വാട്‌സ്ആപ്പ്, സിഗ്നല്‍, ടെലിഗ്രാം തുടങ്ങിയ ജനപ്രിയ ആപ്പുകള്‍ക്ക് ഇനി സജീവമായ സിം കാര്‍ഡ് ഇല്ലാതെ പ്രവര്‍ത്തിക്കാന്‍ കഴിയില്ല. 2025 ലെ ടെലികമ്മ്യൂണിക്കേഷന്‍ സൈബര്‍ സുരക്ഷാ ഭേദഗതി നിയമം പ്രകാരം ഡിവൈസില്‍ സജീവമായ സിം കാര്‍ഡ് ഇല്ലാത്ത ഉപയോക്താക്കള്‍ മെസേജിങ് സേവനം ഉപയോഗിക്കുന്നില്ലെന്ന് ഉറപ്പുവരുത്തണമെന്ന് മെസേജിങ് ആപ്പുകളോട് ടെലികമ്മ്യൂണിക്കേഷന്‍ വകുപ്പ് നിര്‍ദേശിച്ചു.
പുതിയ നിര്‍ദേശം അനുസരിച്ച് ആപ്ലിക്കേഷനുമായി ബന്ധിപ്പിച്ചിരിക്കുന്ന മൊബൈല്‍ നമ്പറുള്ള സിംകാര്‍ഡ് ഫോണില്‍ ആക്ടീവല്ലെങ്കില്‍ ആപ്പുകള്‍ പ്രവര്‍ത്തിപ്പിക്കാനാവില്ല. ആപ്ലിക്കേഷനുകള്‍ നിര്‍ദേശം 90 ദിവസത്തിനകം നടപ്പാക്കണം. 120 ദിവസത്തിനകം ആപ്ലിക്കേഷനുകള്‍ മന്ത്രാലയത്തിന് റിപ്പോര്‍ട്ട് സമര്‍പ്പിക്കുകയും വേണം. നിലവില്‍ ഫോണില്‍ സിംകാര്‍ഡില്ലാതെയും ഇത്തരം ആപ്ലിക്കേഷനുകള്‍ ഉപയോഗിക്കാനാകുമെന്നത് സൈബര്‍ലോകത്ത് സുരക്ഷാഭീഷണിയുണ്ടാക്കുന്നെന്ന് ചൂണ്ടിക്കാട്ടിയാണ് നടപടി. ചട്ടങ്ങള്‍ പാലിക്കാതിരുന്നാല്‍ ടെലികമ്മ്യൂണിക്കേഷന്‍സ് ആക്ട് 2023 പ്രകാരം നടപടിയുണ്ടാകുമെന്നും മന്ത്രാലയം അറിയിച്ചു.
മെസേജിങ് ആപ്പുകളുടെ വെബ് വേര്‍ഷനുകള്‍ക്കും കര്‍ശന നിയന്ത്രണമുണ്ടാകും. വെബ് വേര്‍ഷനുകള്‍ ആറു മണിക്കൂറില്‍ ഒരിക്കല്‍ സ്വമേധയാ ലോഗ്ഔട്ടാകും. പുതിയ സിം-ബൈന്‍ഡിങ് നിയമം അനുസരിച്ച് സിം സജീവമല്ലെങ്കില്‍ ലോഗിന്‍ ചെയ്യുന്നത് അസാധ്യമായ ബാങ്കിങ്, യുപിഐ ആപ്പുകളുടെ അതേ നടപടിക്രമങ്ങള്‍ ഈ ആപ്പുകള്‍ക്കും ബാധകമാക്കും. എല്ലായ്പ്പോഴും സജീവവും പരിശോധിച്ചുറപ്പിച്ചതുമായ ഒരു സിം ആവശ്യമായി വരുമെന്നതിനാല്‍ കുറ്റവാളികള്‍ക്ക് ദൂരെ നിന്ന് വ്യാജ അക്കൗണ്ടുകള്‍ പ്രവര്‍ത്തിപ്പിക്കുന്നത് ബുദ്ധിമുട്ടാക്കുമെന്ന് സര്‍ക്കാര്‍ പറയുന്നു.
ടെലികമ്മ്യൂണിക്കേഷന്‍ വകുപ്പിന്റെ കണക്കനുസരിച്ച്, നിലവില്‍ മിക്ക മെസേജിങ് ആപ്പുകളും ആദ്യമായി ഇന്‍സ്റ്റാള്‍ ചെയ്യുമ്പോള്‍ മാത്രമേ മൊബൈല്‍ നമ്പര്‍ സ്ഥിരീകരിക്കുകയുള്ളൂ. അതിനുശേഷം, സിം നീക്കം ചെയ്യുകയോ പ്രവര്‍ത്തനരഹിതമാക്കുകയോ ചെയ്താലും ആപ്പ് പ്രവര്‍ത്തിക്കുന്നത് തുടരും.
ഈ സമീപനം കാര്യമായ സുരക്ഷാ ദുര്‍ബലത സൃഷ്ടിക്കുന്നുവെന്ന് ചൂണ്ടിക്കാണിച്ചതിനെ തുടര്‍ന്നാണ് നടപടി. ഒരു സിം കാര്‍ഡ് മാറ്റിയതിനുശേഷമോ നിര്‍ജ്ജീവമാക്കിയതിനുശേഷമോ ആപ്പ് ഉപയോഗിക്കുന്നത് തുടരാന്‍ സൈബര്‍ കുറ്റവാളികള്‍ ഈ ദുര്‍ബലത മുതലെടുക്കുന്നു. അവരുടെ ലൊക്കേഷന്‍, കോള്‍ റെക്കോര്‍ഡുകള്‍ അല്ലെങ്കില്‍ കാരിയര്‍ ഡാറ്റ എന്നിവ കണ്ടെത്താനാകുന്നില്ല. ഉപയോക്താക്കളെയും നമ്പറുകളെയും ഉപകരണങ്ങളെയും എളുപ്പത്തില്‍ കണ്ടെത്തുന്നതിലൂടെ വഞ്ചനയും സ്പാമും കുറയ്ക്കാന്‍ ഇത് സഹായിക്കുമെന്ന് സൈബര്‍ വിദഗ്ധര്‍ പറയുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates