മുംബൈ: തുടര്‍ച്ചയായ മൂന്നാം ദിവസവും ഡോളറിനെതിരെ രൂപയുടെ മൂല്യത്തില്‍ വര്‍ധന. വ്യാപാരത്തിന്റെ തുടക്കത്തില്‍ രൂപ 35 പൈസയുടെ നേട്ടമാണ് സ്വന്തമാക്കിയത്. 95.64ലേക്കാണ് രൂപയുടെ മൂല്യം ഉയര്‍ന്നത്. എണ്ണവില ഇടിഞ്ഞത് അടക്കമുള്ള വിഷയങ്ങളാണ് രൂപയെ സ്വാധീനിച്ചത്.

മൂന്ന് ദിവസത്തിനിടെ ഒരു രൂപയിലധികമാണ് രൂപയുടെ മുന്നേറ്റം. അമേരിക്ക- ഇറാന്‍ സംഘര്‍ഷത്തിന് അയവ് വന്നതിനെ തുടര്‍ന്നാണ് എണ്ണവില കുറയാന്‍ തുടങ്ങിയത്. നിലവില്‍ ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 87 ഡോളറില്‍ എത്തി നില്‍ക്കുകയാണ്. കഴിഞ്ഞ രണ്ടുദിവസത്തിനിടെ പത്തുശതമാനത്തിന്റെ ഇടിവാണ് എണ്ണവിലയില്‍ ഉണ്ടായത്.

എണ്ണ വിലയിടിവ് ഓഹരി വിപണിയിലും പ്രതിഫലിച്ചു. ഇന്ന് നേട്ടത്തോടെയാണ് വ്യാപാരം ആരംഭിച്ചത്. പ്രധാനമായി ടിസിഎസ്, ടെക് മഹീന്ദ്ര, എച്ച്‌സിഎല്‍ ടെക്, നെസ് ലെ ഓഹരികളാണ് നേട്ടം ഉണ്ടാക്കിയത്.