മുംബൈ: വ്യാപാരത്തിന്റെ തുടക്കത്തില്‍ താഴേക്ക് പോയ ഓഹരി വിപണി തിരിച്ചുകയറി. വ്യാപാരത്തിനിടെ സെന്‍സെക്‌സ് 350ലധികം പോയിന്റ് ആണ് മുന്നേറിയത്. 85,800 കടന്നാണ് സെന്‍സെക്‌സ് കുതിച്ചത്. നിഫ്റ്റി 26,300 എന്ന സൈക്കോളജിക്കല്‍ ലെവലിനും മുകളില്‍ പോയി പുതിയ ഉയരം കുറിച്ചു.

വന്‍കിട കമ്പനികളില്‍ നിക്ഷേപം വര്‍ധിച്ചതാണ് വിപണി തിരിച്ചുകയറാന്‍ കാരണം. പ്രമുഖ ബ്ലൂചിപ്പ് കമ്പനിയായ റിലയന്‍സ് ഇന്‍ഡസ്ട്രീസ് ഒരു ശതമാനമാണ് ഉയര്‍ന്നത്. ഓഹരി ഒന്നിന് 1,611 എന്ന നിലയിലേക്കാണ് റിലയന്‍സിന്റെ വില ഉയര്‍ന്നത്. വില്‍പ്പനക്കാരില്‍ നിന്ന് ഓഹരികള്‍ വാങ്ങിക്കൂട്ടുന്ന നിലയിലേക്ക് വിദേശ നിക്ഷേപകര്‍ മാറിയതും വിപണിയെ സ്വാധീനിച്ചതായി വിദഗ്ധര്‍ അഭിപ്രായപ്പെട്ടു.

ഏഷ്യന്‍ വിപണികളെല്ലാം നേട്ടത്തിന്റെ പാതയിലാണ്. ഇതും വിപണിയില്‍ പ്രതിഫലിക്കുന്നുണ്ട്. ഇതിന് പുറമേ എണ്ണവില കുറയുന്നതും വിപണിക്ക് കരുത്തുപകരുന്നതായും വിദഗ്ധര്‍ ചൂണ്ടിക്കാണിക്കുന്നു. വിപണിയില്‍ പണലഭ്യത ഉറപ്പുവരുത്താന്‍ ഓപ്പണ്‍ മാര്‍ക്കറ്റ് ഓപ്പറേഷനിലൂടെ റിസര്‍വ് ബാങ്ക് നടത്തുന്ന ഇടപെടലും വിപണിയില്‍ പ്രതിഫലിക്കുന്നുണ്ട്.

അതേസമയം ഡോളറിനെതിരെ രൂപ റെക്കോര്‍ഡ് താഴ്ചയിലാണ്. ഇന്ന് വ്യാപാരത്തിന്റെ തുടക്കത്തില്‍ നാലുപൈസയുടെ നഷ്ടം നേരിട്ടതോടെയാണ് താഴ്ചയുടെ റെക്കോര്‍ഡ് തിരുത്തിയത്. 90.24 എന്ന നിലയിലേക്കാണ് രൂപ കൂപ്പുകുത്തിയത്. കഴിഞ്ഞ ദിവസം 20 പൈസയുടെ നഷ്ടത്തോടെയാണ് രൂപ ക്ലോസ് ചെയ്തത്. വെനസ്വേലയില്‍ അമേരിക്ക സ്വീകരിച്ച സൈനിക നടപടിയെ തുടര്‍ന്ന് ആഗോളതലത്തില്‍ ഉടലെടുത്ത അനിശ്ചിതത്വങ്ങളാണ് രൂപയെ ബാധിച്ചത്.