ഹൈദരാബാദ്:രാജ്യത്തെ ഐടി മേഖലയില്‍ തൊഴിലാളി യൂണിയനുകളുടെ ആവശ്യമില്ലെന്ന് മുന്‍നിര ഐടി കമ്പനി ഇന്‍ഫോസിസിന്റെ മുന്‍ ചീഫ് ഫിനാന്‍ഷ്യല്‍ ഓഫീസര്‍ വി ബാലകൃഷ്ണന്‍. ഇന്‍ഫോസിസ്, കോഗ്നിസെന്റ്, ടെക്ക് മഹീന്ദ്ര തുടങ്ങിയ പ്രമുഖ കമ്പനികള്‍ ജീവനക്കാരെ നിയമവിരുദ്ധമായി പിരിച്ചുവിടുന്നതിനെതിരേ ചെന്നൈ കേന്ദ്രീകരിച്ച് ഒരു തൊഴിലാളി യൂണിയന്‍ രൂപീകരിക്കുന്നുണ്ടെന്ന വാര്‍ത്തകള്‍ക്കിടയിലാണ് ബാലകൃഷ്ണന്റെ പ്രസ്താവന.

ഐടി മേഖലയില്‍ ജീവനക്കാര്‍ക്ക് മാന്യമായ ശമ്പളം നല്‍കുന്നുണ്ടെന്നും ഏതെങ്കിലും തരത്തിലുള്ള പ്രതിസന്ധികള്‍ ഉണ്ടാകുമ്പോള്‍ മാത്രമാണ് തൊഴിലാളി യൂണിയനുകളുടെ ആവശ്യം ഉയര്‍ന്നുവരുന്നതെന്നും എന്നാല്‍ അവ സ്ഥിരമായി നിലനില്‍ക്കില്ലെന്നും ബാലകൃഷ്ണന്‍ അഭിപ്രായപ്പെട്ടു.

തൊഴില്‍ നീതിയുടെ കാര്യത്തില്‍ ഐടി മേഖല മുന്നിലാണ്. എങ്കിലും ചില പ്രത്യേക സന്ദര്‍ഭങ്ങളില്‍ യൂണിയനുകളുടെ ആവശ്യം സംബന്ധിച്ച ചര്‍ച്ചകളുണ്ടായേക്കും. ഒരു യൂണിയന്‍ ഉണ്ടാകുന്നത് ഇന്ത്യന്‍ ഐടി രംഗത്തിന് ഗുണകരമാകുമെന്ന് തോന്നുന്നില്ല. -അദ്ദേഹം കൂട്ടിച്ചേര്‍ത്തു.