മുംബൈ: വോട്ടെണ്ണലിന്റെ ആദ്യ മണിക്കൂറുകള്‍ പിന്നിടുമ്പോള്‍ ഓഹരി വിപണിയിലും നേട്ടം. സെന്‍സെക്‌സ് 40,000 പോയിന്റാണ് രാവിലെ ആരംഭിച്ച വ്യാപാരത്തില്‍ കടന്നിരിക്കുന്നത്. ഭരണത്തുടര്‍ച്ചയുണ്ടായേക്കുമെന്ന ആദ്യ ഫലസൂചനകളാണ് ഓഹരി വിപണിയിലെ കുതിച്ച് ചാട്ടത്തിന് കാരണമെന്നാണ് വിലയിരുത്തല്‍.

 എക്‌സിറ്റ് പോളുകള്‍ പോലെ തന്നെ അന്തിമ ഫലം ഉണ്ടായേക്കുമെന്ന വിലയിരുത്തലുകളെ തുടര്‍ന്ന് ബിഎസ്ഇ, എന്‍എസ്ഇ എന്നിവ വലിയ മുന്നേറ്റമുണ്ടാക്കി. എന്‍ഡിഎ തനിച്ച് 300 സീറ്റുകള്‍ നേടുമെന്നാണ് നിലവിലെ ലീഡ് നില കാണിക്കുന്നത്. ഇതോടെ ബാങ്കിങ് ഓഹരികള്‍ക്ക് പുറമേ റിലയന്‍സ്, ലാര്‍സന്‍ ആന്റ് ടര്‍ബോ, എന്നിവ വലിയ നേട്ടമുണ്ടാക്കി. നിഫ്റ്റി ബാങ്ക് ഇന്‍ഡക്‌സ് ഇതാദ്യമായി 31,000 പോയിന്റ് കടന്നു. 

ഭരണത്തുടര്‍ച്ച ഉണ്ടാകുന്നതോടെ സമീപകാലത്തുണ്ടായ മാന്ദ്യം കുതിപ്പിലേക്ക് വഴിമാറുമെന്നും വ്യാവസായിക വ്യാപര രംഗങ്ങളില്‍ നേട്ടമുണ്ടാകുമെന്നുമാണ് വ്യാപാരികളുടെ പ്രതീക്ഷ.