ന്യൂഡല്‍ഹി: രാജ്യത്ത് സാമ്പത്തിക തളര്‍ച്ച തുടരുന്നു എന്ന ശക്തമായ സൂചന നല്‍കി, യാത്രവാഹനങ്ങളുടെ വില്‍പ്പനയില്‍ വീണ്ടും ഇടിവ്. സെപ്റ്റംബറില്‍ 23.69 ശതമാനത്തിന്റെ ഇടിവാണ് രേഖപ്പെടുത്തിയത്. തുടര്‍ച്ചയായ പതിനൊന്നാം മാസമാണ് യാത്രവാഹനങ്ങളുടെ വില്‍പ്പനയില്‍ തളര്‍ച്ച നേരിടുന്നത്. വാഹനവിപണിയിലെ തളര്‍ച്ച ജീവനക്കാരുടെ പിരിച്ചുവിടലിനും മറ്റും കാരണമായിട്ടുണ്ട്.

 2,23,317 യാത്രവാഹനങ്ങളാണ് സെപ്റ്റംബറില്‍ വിറ്റഴിച്ചത്. മുന്‍ വര്‍ഷം സമാനകാലയളവില്‍ ഇത് 2,92,660 യൂണിറ്റായിരുന്നു. കാര്‍വില്‍പ്പനയിലും സമാനമായ ഇടിവാണ് രേഖപ്പെടുത്തിയിരിക്കുന്നത്. 33 ശതമാനത്തിന്റെ ഇടിവാണ് ഉണ്ടായിരിക്കുന്നത്. സെപ്റ്റംബറില്‍ 1,31,281 കാറുകള്‍ മാത്രമാണ് വിറ്റഴിച്ചതെന്ന് സൊസൈറ്റി ഓഫ് ഇന്ത്യന്‍ ഓട്ടോമൊബൈല്‍ മാന്യുഫാക്‌ച്ചേഴ്‌സിന്റെ റിപ്പോര്‍ട്ടില്‍ പറയുന്നു.

മോട്ടോര്‍സൈക്കിള്‍ വില്‍പ്പനയിലും ഇടിവുണ്ടായിട്ടുണ്ട്. 23 ശതമാനത്തിന്റെ ഇടിവാണ് രേഖപ്പെടുത്തിയിരിക്കുന്നത്. ഇരുചക്രവാഹനങ്ങളുടെ വില്‍പ്പനയിലുണ്ടായിട്ടുളള ഇടിവ് 22 ശതമാനമാണെന്നും കണക്കുകള്‍ വ്യക്തമാക്കുന്നു. വാണിജ്യവാഹനങ്ങളുടെ വില്‍പ്പനയിലുണ്ടായ ഇടിവ് 39 ശതമാനമാണ്.