പ്രായമായവരിൽ മാത്രമല്ല, ഇന്ന് ചെറുപ്പക്കാരിലും നടുവേദന വ്യാപകമാണ്. ദീർഘനേരമുള്ള ഇരുപ്പും തെറ്റിയ രീതിയിലുള്ള ഇരിപ്പും നിൽപ്പും അതുപോലെ വ്യായാമമില്ലായ്മയും മാനസിക സമ്മർദ്ദവും നടുവേദനയ്ക്ക് കാരണമാകാം. രാവിലെ ഒരു എട്ട് മിനിറ്റ് മാറ്റിവെയ്ക്കാമെങ്കിൽ നടുവിന് തോന്നുന്ന വേദനയും വഴക്കമില്ലായ്മും ഒഴിവാക്കാൻ സാധിക്കും.

സ്ട്രെച്ചിങ് വ്യായാമങ്ങൾ

സന്ധികൾക്കും പേശികൾക്കും ഏറ്റവും മികച്ച ഒന്നാണ് സ്ട്രെച്ചിങ്. സ്ട്രെച്ചിങ് ചെയ്യുന്നതിലൂടെ രക്തയോട്ടം മെച്ചപ്പെടാനും പേശികൾ അയയാനും വീക്കം കുറയ്ക്കുകയും ചെയ്യുന്നതിലൂടെ നടുവേദന ലഘൂകരിക്കാനും സഹായിക്കുന്നു. രാവിലെ കുറഞ്ഞത് എട്ട് മിനിറ്റ് നേരം സ്ഥിരമായി ഇത്തരം വ്യായാമങ്ങൾ ചെയ്യുന്നത് നട്ടെല്ലിനെ താങ്ങിനിർത്തുന്ന പേശികൾക്ക് കരുത്ത് പകരുകയും ഭാവിയിൽ നടുവേദന വരാനുള്ള സാധ്യത ഇല്ലാതാക്കുകയും ചെയ്യും.

നടുവേദന കുറയ്ക്കാനായി വീട്ടിൽ ചെയ്യാവുന്ന ചില വ്യായാമങ്ങളുണ്ട്

കാൽമുട്ടുകൾ നെഞ്ചോട് ചേർത്ത് പിടിക്കുന്ന സ്ട്രെച്ച് (Knee-to-chest stretch), നട്ടെല്ലിന് വഴക്കം നൽകുന്ന ക്യാറ്റ് കൗ സ്ട്രെച്ച് (Cat-cow stretch), പെൽവിക് ടിൽറ്റുകൾ (Pelvic tilts), ബാക്ക് എക്സ്റ്റൻഷൻ എന്നിവ ഇതിൽ പ്രധാനമാണ്. ഈ വ്യായാമങ്ങൾ ദിവസവും പ്രഭാതത്തിൽ കൃത്യമായി ചെയ്യുന്നത് നട്ടെല്ലിന്റെ ആകൃതി മെച്ചപ്പെടുത്താനും ശരീരത്തിന്റെ വഴക്കം വർധിപ്പിക്കാനും സഹായിക്കും. ഏതൊരു വ്യായാമവും ഫലം നൽകുന്നത് അത് മുടങ്ങാതെ ചെയ്യുമ്പോഴാണെന്ന് വിദഗ്ധർ ഓർമ്മിപ്പിക്കുന്നു.

ലഘുവായ നടുവേദനയ്ക്ക് വ്യായാമങ്ങൾ ഫലപ്രദമാണെങ്കിലും ചില കാര്യങ്ങൾ പ്രത്യേകം ശ്രദ്ധിക്കേണ്ടതുണ്ട്. വേദന അതീവ ഗുരുതരമാണെങ്കിലോ, കാലുകൾക്ക് മരവിപ്പോ തളർച്ചയോ അനുഭവപ്പെടുന്നുണ്ടെങ്കിലോ ഉടൻ തന്നെ ഒരു ഡോക്ടറുടെ ഉപദേശം തേടേണ്ടതാണ്. വിട്ടുമാറാത്തതും തീവ്രവുമായ വേദനയ്ക്ക് കൃത്യമായ രോഗനിർണ്ണയവും ചികിത്സയും ആവശ്യമാണ്. എന്നാൽ തുടക്കത്തിലുള്ള വേദനകളും പേശിവലിവും കുറയ്ക്കാൻ ഈ എട്ട് മിനിറ്റ് പ്രഭാത ശീലം വലിയ മാറ്റങ്ങൾ കൊണ്ടുവരുമെന്ന കാര്യത്തിൽ സംശയമില്ല.