പ്രോട്ടീൻ, നാരുകൾ, ധാരാളം വിറ്റാമിനുകള്‍ തുടങ്ങി ആരോഗ്യകരമായ നിരവധി പോഷകങ്ങള്‍ കടല പോലുള്ള പയറുവര്‍ഗങ്ങളില്‍ അടങ്ങിയിട്ടുണ്ട്. എന്നാല്‍ മനുഷ്യരിൽ ദഹനപ്രശ്നങ്ങൾക്കും ചില പോഷക കുറവുകൾക്കും കാരണമാകുന്ന ഫൈറ്റിക് ആസിഡും പയർവർഗങ്ങൾ, നട്സ്, ധാന്യങ്ങൾ എന്നിവയിൽ ഉയർന്ന അളവിൽ അടങ്ങിയിരിക്കുന്നു.

ഇവ ഉള്ളില്‍ എത്തിയാല്‍, ഇരുമ്പ്, സിങ്ക്, കാൽസ്യം എന്നിവയുൾപ്പെടെയുള്ള ധാതുക്കളെ ആഗിരണം ചെയ്യാനുള്ള ശരീരത്തിന്‍റെ കഴിവ് കുറയ്ക്കുന്നു. അതുകൊണ്ട് തന്നെ ശരിയായ രീതിയില്‍ തയ്യാറാക്കിയില്ലെങ്കില്‍ ആരോഗ്യ പ്രശ്നങ്ങള്‍ക്ക് കാരണമാകും. എട്ട് മണിക്കൂര്‍ വരെ കുതിര്‍ത്ത് വെച്ച ശേഷം വേണം കടല പോലുള്ളവ തയ്യാറാക്കാന്‍.

ഇങ്ങനെയൊക്കെയാണെങ്കിലും പെട്ടെന്ന് ഒരു കടലക്കറി കഴിക്കാന്‍ തോന്നിയാല്‍ എന്ത് ചെയ്യും? നേരത്തെ കുതിര്‍ക്കാതെ തന്നെ കടല വേവിച്ചെടുക്കാന്‍ ചില മാര്‍ഗങ്ങളുണ്ട്.

പ്രഷർ കുക്കറില്‍ വേവിക്കുക

ആവിയും ഉയർന്ന മർദ്ദവും ഉപയോഗിക്കുമ്പോള്‍ കടല മയപ്പെടും. പ്രഷർ കുക്കറിൽ കടലയുടെ അളവിന്‍റെ മൂന്ന് മടങ്ങ് വെള്ളം ചേര്‍ക്കുക. ഇതിലേക്ക് ഒരു നുള്ള് ബേക്കിങ് സോഡ ചേര്‍ക്കുക. ഇത് കടല വേഗത്തില്‍ മൃദുവാകാന്‍ സഹായിക്കും. ശേഷം ഉയർന്ന തീയിൽ 4-5 വിസിലുകൾ വരെ വേവിക്കുക. തീ കുറച്ച് 10-15 മിനിറ്റ് കൂടി ചെറിയ തീയിൽ വേവിക്കുക. ആവി പോയ ശേഷം തുറന്നു ഉപയോഗിക്കാം.

ചൂടുവെള്ളവും ഉപ്പും

കടല നന്നായി കഴുകിയെടുത്ത ശേഷം ചൂടുള്ള ഒരു പാത്രം അല്ലെങ്കിൽ കാസറോൾ എടുത്ത് അതിലേക്ക് കഴുകിയ കടല ചേർത്ത് ചൂടുവെള്ളമൊഴിക്കുക. ഒരു തരി ഉപ്പും ഇടുക. ഇത് മൂടി ഒരു മണിക്കൂറെങ്കിലും മാറ്റി വയ്ക്കുക. ശേഷം എടുത്ത് കറി വയ്ക്കാം.

തീവ്രമായ മുടി കൊഴിച്ചില്‍; ഭക്ഷണത്തിലുണ്ട് പരിഹാരം

തിളപ്പിക്കുക

ആദ്യം തന്നെ കടല നന്നായി കഴുകുക. ഒരു പാത്രത്തിൽ, ഈ കടല ചേർത്ത് വെള്ളം ഒഴിച്ച് തിളപ്പിക്കുക. ഏകദേശം 10 മിനിറ്റ് വരെ തിളച്ച ശേഷം. തീ ഓഫ് ചെയ്ത് പാത്രം ഒരു മൂടി കൊണ്ട് മൂടുക. ഈ ചൂടുവെള്ളത്തിൽ 1-2 മണിക്കൂർ വയ്ക്കുക. ഇത് രാത്രി മുഴുവന്‍ കുതിർക്കുന്നത് പോലെ ഫലപ്രദമല്ലെങ്കിലും കുറഞ്ഞ സമയത്തിനുള്ളിൽ കടല വേവിച്ചെടുക്കാന്‍ സഹായിക്കും.

ഐസ് ക്യൂബ്സ്

ഐസ് ക്യൂബ് ഉപയോഗിച്ച് കടല വേവിക്കാം. ഇതിനായി കടല ആദ്യം കുക്കറില്‍ ഇട്ട് രണ്ടു വിസില്‍ വരുന്ന വരെ വേവിക്കുക. ആവി പൂര്‍ണമായും പോയ ശേഷം തുറക്കുക. ഇതിലേക്ക് ഐസ് ക്യൂബ്സ്, തണുത്ത വെള്ളം എന്നിവ ഒഴിച്ച് വീണ്ടും അടുപ്പത്ത് വയ്ക്കുക. ഇത് ഏഴോ എട്ടോ വിസില്‍ വരുന്നത് വരെ വേവിക്കുക. ഇങ്ങനെ ചെയ്‌താല്‍ കുതിര്‍ത്ത് എടുക്കുന്ന പോലെത്തന്നെ കടല വെന്തുകിട്ടും.