സഹജീവികളെ സ്‌നേഹിച്ചാല്‍ എന്താണ് തെറ്റ്? ഈ വീഡിയോ കണ്ടാല്‍ ആരും ചോദിച്ചുപോകുന്ന ചോദ്യമാണ്. ഒരു മിണ്ടാപ്രാണിയോട് മനുഷ്യന്‍ കാണിച്ച കൊടുംക്രൂരതയുടെ നേര്‍ക്കാഴ്ചയാണ് സൈബര്‍ ലോകത്ത് ഇപ്പോള്‍ വ്യാപകമായി പ്രചരിക്കുന്ന ഈ വീഡിയോ. 

കുത്തനെയുള്ള പര്‍വതം കയറി വരികയായിരുന്നു കരടി. എന്നാല്‍ മുകളില്‍ കാഴ്ചക്കാണാനെത്തിയവര്‍ കല്ലെടുത്ത് എറിഞ്ഞ് കരടിയെ വീഴ്ത്തുന്ന ഉളളുലയ്ക്കുന്ന ദൃശ്യങ്ങളാണ് വ്യാപകമായി പ്രചരിക്കുന്നത്. ഈ പ്രവൃത്തി ചെയ്തവരോടുളള രോഷവും സൈബര്‍ ഇടങ്ങളില്‍ പ്രകടമാണ്. കുത്തനെയുള്ള പര്‍വതത്തില്‍ നിന്നും കരണം മറിഞ്ഞ് കുത്തിയൊലിച്ച് ഒഴുകുന്ന പുഴയിലേക്കാണ് പാവം മിണ്ടാപ്രാണി വീണത്.  ജമ്മു കശ്മീരിലെ കാര്‍ഗിലിലാണ് ക്രൂരത അരങ്ങേറിയത്. 

കരടി പാറക്കെട്ടിന് മുകളിലേക്ക് പിടിച്ചു കയറുമ്പോഴാണ് ജനങ്ങള്‍ കല്ലെറിഞ്ഞത്. ഒരു കല്ല് കരടിയുടെ തലയിലാണ് കൊണ്ടത്. ഇതോടെ കരടിയുടെ നിലതെറ്റി പാറക്കെട്ടിന് താഴേക്ക് പതിച്ചു. പാറക്കല്ലില്‍ പലതവണ തട്ടി കരണം മറിഞ്ഞാണ് കരടി പുഴയിലേക്ക് വീഴുന്നത്. കരടിക്ക് ഗുരുതരമായ പരുക്കേറ്റിട്ടുണ്ടെന്നാണ് സൂചന. ഈ വീഡിയോ കശ്മീര്‍ മുന്‍ മുഖ്യമന്ത്രി മെഹബൂബ മുഫ്തിയും ട്വീറ്റ് ചെയ്തു.