മുംബൈ: രണ്ട് മാസത്തെ ചികിത്സ കൊണ്ട് ലോകത്തിലെ ഏറ്റവും ഭാരമേറിയ യുവതിയായിരുന്ന ഇമാന്റെ തൂക്കം 242 കിലോ കുറയ്ക്കാനായെന്ന വാര്‍ത്തയെ സന്തോഷത്തോടെയും അത്ഭുതത്തോടെയുമാണ് രാജ്യം കേട്ടത്. എന്നാല്‍ ഭാരം കുറയ്ക്കാനാകുമെങ്കിലും ഇമാന്‍ അഹ്മദ് എന്ന ഈജിപ്ത്യന്‍ യുവതിക്ക് ഒരിക്കലും നടക്കാന്‍ സാധിക്കില്ലെന്നാണ് ഡോക്ടര്‍മാര്‍ ഇപ്പോള്‍ പറയുന്നത്. 

അമിത ഭാരത്തെ തുടര്‍ന്ന് തനിയെ എഴുന്നേറ്റിരിക്കാന്‍ കൂടിയ കഴിയാത്ത ഇമാന്‍ കഴിഞ്ഞ 25 വര്‍ഷമായി കിടപ്പിലാണ്. ഇന്ത്യയിലെ ചികിത്സയിലൂടെ നടക്കാന്‍ കഴിയുമെന്നായിരുന്നു ഇമാന്റേയും കുടുംബാംഗങ്ങളുടേയും പ്രതീക്ഷ.

ഇമാന്‍ ഇരിക്കാന്‍ സാധിക്കുമെന്നും തൈറോയിഡ് പരിതി സാധാരണ നിലയിലേക്കെത്തിയെന്നും ഇമാന്റെ ചികിത്സയ്ക്ക് നേതൃത്വം നല്‍കുന്ന മുഫാസല്‍ ലക്ഡാവാല പറഞ്ഞു. എന്നാല്‍ ഇമാന് ഒരിക്കലും നടക്കാന്‍ സാധിച്ചെന്നു വരില്ല. പതിനൊന്നാം വയസിലുണ്ടായ പക്ഷാഘാതത്തെ തുടര്‍ന്ന് ഇമാന്റെ കാലുകളുടെ വളര്‍ച്ച ഇല്ലാതായെന്നാണ് ഡോക്ടര്‍മാര്‍ പറയുന്നത്. 25 വര്‍ഷം ഇമാന്‍ പൂര്‍ണമായും കിടപ്പിലായതോടെ കാലുകളുടെ അവസ്ഥ വീണ്ടും മോഷമാവുകയായിരുന്നു.