ഒരു നിമിഷമുണ്ട്
ജീവിതത്തിനും മരണത്തിനുമിടയില്‍
തീരുമാനത്തിനായി
വിറങ്ങലിച്ചു നില്‍ക്കുന്ന ഒരു നിമിഷം.
മഞ്ഞുമൂടിയ താഴ്‌വരയുടെ വെളുമ്പില്‍
പെരുവിരല്‍ ഒന്നുയര്‍ത്തിയാല്‍,
അല്ലെങ്കില്‍
ഇടതു കൈത്തണ്ടയില്‍ വെച്ച മൂര്‍ച്ച
ഒന്നമര്‍ത്തിയാല്‍,
ചില നേരങ്ങളില്‍
വലിച്ചുകെട്ടിയ കയര്‍ കുരുക്കില്‍
കഴുത്ത് ചേര്‍ത്തുറപ്പിച്ചാല്‍...
ജീവിച്ചിരിക്കണോ മാഞ്ഞുപോവണോ?!
അവമതികള്‍, ഏകാന്തത
നിസ്സഹായത...
സകലമാന പ്രതിസന്ധികള്‍ക്കും
ഉത്തരമില്ലായ്മകള്‍ക്കും നേരെ
നിവര്‍ന്നുനിന്ന് പ്രഖ്യാപിക്കുന്നു:
ജീവിക്കണം!
പെരുവിരല്‍, വിളുമ്പില്‍നിന്ന്
മൂര്‍ച്ച, രക്തക്കുഴലില്‍നിന്ന്
ശിരസ്സ്, കയര്‍ കുരുക്കില്‍നിന്ന്
പിന്‍വലിച്ച്
ജീവിതത്തിലേക്ക് ഇറങ്ങിവരാം.
അപ്പോള്‍,
അപ്പോള്‍ മാത്രം
വെളിച്ചം കെട്ടുപോയ ഭൂമിക്കു മീതെ
ഒരു നക്ഷത്രം വിരിയും
നിലാവ് പോലെ
പൊടുന്നനെ തെളിഞ്ഞ
മൊബൈല്‍ സ്‌ക്രീനില്‍
ഒരു കുഞ്ഞുമുഖം
പരിഭവിക്കും
ഇരുട്ടായില്ലേ
വരാറായില്ലേ
ഇല്ലേ... ഇല്ലേ...
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates