ഇരുട്ടില്‍ ഇലവിന്‍ ചോട്ടില്‍
കയര്‍പൊട്ടിച്ചു വന്നതാം
പയ്യിനെപ്പോല്‍ നാലു കാലില്‍
വാവച്ചണ്ണന്റെ പീടിക.

ചുണ്ണാമ്പുവിരലാല്‍ത്തൊട്ട
പുള്ളികള്‍ മെയ്യിലാകെയും
മുക്രയിട്ടു കുതിക്കാനായ്
കരിങ്കല്ലിന്‍ കുളമ്പുകള്‍.

മെലിഞ്ഞ കൈകളാല്‍ വാവ 
ച്ചണ്ണനൊന്നു തലോടിയാല്‍
ചുരന്നൂ ചായ, പൈക്കുട്ടി
പോലെ നക്കുന്നു മഞ്ഞല.

പറ്റുകാര്‍ പമ്മി നീങ്ങുമ്പോള്‍
കുത്താനായ്ച്ചുര മാന്തിയും,
കാക്കത്തമ്പ്രാട്ടിമാര്‍ക്കേറി
ഇരിക്കാന്‍ പുറമേകിയും,

വെണ്ണിലാക്കഞ്ഞിവെള്ളത്തിന്‍
ചരുവത്തെ കമിഴ്ത്തിയും
വഴിവക്കത്തു നില്‍ക്കുന്നു.
മാടം മാടെന്ന മാതിരി.

കാണാക്കയറിനാല്‍ കാലം,
കഴുത്തിലിട്ട കെട്ടുമായ്
വാവച്ചനെ വലിക്കുമ്പോള്‍
കൂടെ നീങ്ങുന്നു പീടിക.